वीरगन्ज,२०जेठ:पर्साकाे बहुदरमाई नगरपालिका वडा नम्बर ८ रामनगरी घर भएका सशस्त्र प्रहरी बलका सशस्त्र प्रहरी सहायक निरीक्षक (असई)शक्ति राम काभ्रेपलान्चोकमा युवतीसहित मृत फेला परेका छन्।
गएको वैशाख १९ गते गणबाट २ दिनको विदा लिएर हिँडेका राम बुधबार बिहान काभ्रेको पाँचखाल नगरपाािलका वडा नम्बर ३ ठुली सामुदायिक वनमा झुण्डिएको अवस्थामा मृत फेला परेको जिल्ला प्रहरी कार्यालय काभ्रेले जानकारी दिएको छ।
नजिकै अर्को रुखमा कैलालीकाे घोडाघोडी नगरपालिका १ की २६ वर्षकी शर्मिला चौधरी पनि मृत फेला परेकी छन्।गत बैशाख १८ गते शक्ति रामलाई भेट्न भन्दै उनी काभ्रे आएकी थिइन्।
सशस्त्र प्रहरी बल नम्बर १५ गण काभ्रे दरबन्दी भएका राम वैशाख १९ गते २ दिनको बिदा लिएर गएका थिए।
तर गणबाट विदा लिएर हिडेका राम सम्पर्कबिहिन रहेको भन्दै परिवारले नै खोजतलासका लागि निवेदन दिएका थिए।
सशस्त्र प्रहरीले उक्त निवेदन वैशाख २१ गने नै जिल्ला प्रहरी कार्यालय काभ्रेपलान्चोकमा पठाएकाे थियाे।
शर्मिलाका भाइ रन्जित चौधरीले पनि बैशाख २५ गते प्रहरी वृत्त बालाजुमा खोजतलासको लागि निवेदन दिएका थिए।
उनीहरू दुवै जनाको मोबाइलमा सम्पर्क हुन सकेको थिएन। प्रहरी वृत्त बालाजुबाट खोजतलास हुँदा शर्मिला चौधरीको मोबाइलको अन्तिम लोकेसन काभ्रेपलाञ्चोकमा देखिएको थियो।
बुधबार मौवाको २ ओटा रुखमा महिला र पुरुषको जस्तो देखिने सडेगलेको २ वटा कंकाल मात्र झुण्डिरहेको भन्ने खबर प्रहरीलाई स्थानीयले दिएका थिए।
त्यसपछि प्रहरी चौकी पाँचखालबाट प्रहरी निरीक्षकको कमाण्डमा खटिएको टोलीले शक्ति राम र उनकी साथी शर्मिला रहेको पहिचान गरेको थियो।
दुवै जनाको शव पोष्टमार्टमका लागि धुलिखेल अस्पतालमा राखिएको छ। थप अनुसन्धान पनि भइरहेको जिल्ला प्रहरी कार्यालय काभ्रेपलान्चोकले जानकारी दिएको छ।