काठमाडौं,१९जेठःमधेस प्रदेशका निलम्बित सांसद तथा पूर्वराज्यमन्त्री सरोजकुमार सिंहलाई भ्रष्टाचार मुद्दामा विशेष अदालतले ४ वर्ष कैदको सजाय सुनाएको छ। विशेष अदालतले उनलाई दोषी ठहर गरी मंगलबार सजाय सुनाएको हो।
विशेष अदालतका न्यायाधीशहरू सुदर्शनदेव भट्ट, उमेश कोइराला र विदुर कोइरालाको इजलासले उनलाई ४ वर्ष कैद र ३८ लाख ५० हजार एक सय ३९ रुपैयाँ जरिवानाको सजाय सुनाएको हो।
उपभोक्ता समितिहरूसँग घुस लिएको प्रमाण भेटिएपछि अख्तियार दुरुपयोग अनुसन्धान आयोगले उनलाई गत वर्ष पक्राउ गरी अनुसन्धान गरेको थियो। जसमा उनी दोषी ठहर भएका हुन्। सांसद विकास कोषको रकमबाट उनले ३७ प्रतिशतसम्म कमिसन लिएको खुलेको थियो। त्यस्तो कमिसन उनको खातामै बरामद भएको थियो।
सिंह महोत्तरीको निर्वाचन क्षेत्र नम्बर ४(ख) बाट निर्वाचित सांसद हुन्। सिंह जनता समाजवादी पार्टी नेपालका नेता हुन्। साभारःनयाँपत्रिका