वीरगन्ज,३जेठःवीरगन्ज महानगरपालिका वडा नम्बर १० मा आयोजित चौंथो वडास्तरीय क्रिकेट टुर्नामेन्ट प्रतियोगिताको उपाधि बागमतीले जितेको छ।ठाकुरराम बहुमुखी क्याम्पसको क्रिकेट मैदनानमा शनिबार भएको फाइनल खेलमा गण्डकीलाई ८ विकेटले पराजित गर्दै बागमतीले उपाधि उचालेको हो ।
गण्डकीले दिएको ११६ रनको लक्ष्य बागमतीले १३ ओभरमा केवल दुई विकेटमा मात्र गुमाएर पुरा गरेको हो । यसअघि टस हारेर पहिले ब्याटिंग गरेको गण्डकीले १९.५ ओभरमा अलआउट हुदैं केवल ११५ रन मात्र बनाएको थियो ।
प्रतियोगिताको समापन समारोहमा वडा नम्बर १० का कार्यवाहक वडाध्यक्ष सन्तोष जैशी चालागाइँले उपाधि विजेता बागमती टिमलाई नगद २१ हजार रुपैयाँसहित ट्रफी प्रदान गरे । यस्तै उपविजेता गण्डकीलाई नगद १५ हजार रुपैयाँसहित ट्रफी प्रदान गरिएको थियो ।
वैशाख २६ गतेदेखि सुरु भएको प्रतियोगितामा वडा नम्बर १० का युवा र किशोरहरु सम्मिलित ८ वटा टीमले भाग लिएका थिए ।घडिअर्वा स्पोर्टस क्लब र पशुपति आदर्श क्लबको सहयोगमा वडा नम्बर १० को वडा कार्यालयले आयोजना गरेको प्रतियोगिताको उद्घाटन पर्सा क्षेत्र नम्बर २ का प्रतिनिधिसभा सदस्य (सांसद) सुशीलकुमार कानुले गरेका थिए ।
समापन समारोहमा प्रतियोगिताको उद्घाटन समारोहमा आयोजित मार्च पासमा पहिलो, दोस्रो र तेस्रो भएका विद्यालयहरुलाई पुरस्कृत पनि गरिएको थियो ।
कार्यवाहक वडाध्यक्ष सन्तोष जैशी चौलागाईको अध्यक्षतामा भएको समापन समारोहमा उद्योगपति अशोक बैद्य , वडा सदस्यहरु प्रभु महतो,प्रेमशीला देवी,मिश्रादेवी नगरकोटी, वडा कार्यालयका सचिव पवन प्रधान, घडिअर्वा छठपूजा ब्यवस्थापन समितिका अध्यक्ष राकेश साह , पूर्व अध्यक्ष दिलिप साह कानु,घडिअर्वा स्पोर्टस क्लबका अध्यक्ष सन्तोष कानु , प्याब्सन वीरगन्जका अध्यक्ष राहुल श्रीवास्तव लगायतकाकोपनि उपस्थिति रहेको थियो ।
