काठमाडौं,७साउन:नेकपा एमालेले पूर्वराष्ट्रपति विद्या भण्डारीको पार्टी सदस्यता कायम नराख्ने निर्णय गरेको छ ।मंगलबार राति अबेरसम्म बसेकाे एमाले केन्द्रीय कमिटीकाे बैठकले यस्ताे निर्णय गरेकाे हाे ।याे निर्णयले भण्डारीलाई लाई राजनीतिमा आउन नदिने भएको छ ।
नेकपा एमालेका अध्यक्ष केपी शर्मा ओलीले पूर्वराष्ट्रपति भण्डारीलाई सक्रिय राजनीतिमा नफर्कन आग्रह गर्ने प्रस्ताव पार्टी बैठकमा गरेका थिए ।उक्त प्रस्ताव पारित भएसँगै पूर्वराष्ट्रपति भण्डारीको एमालेमा राजनीति गर्ने बहस तत्काललाई रोकिएको छ ।
बैठकमा एमाले अध्यक्ष ओलीले भण्डारीलाई राजनीतिमा नफर्कन पार्टीले आग्रह गर्ने निर्णय सुनाएका थिए । उनले भने, ‘पूर्वराष्ट्रपति राजनीतिमा आउन हुँदैन, मिल्दैन ।’
नवौँ केन्द्रीय कमिटी बैठकले पूर्व राष्ट्रपति भण्डारी राजनीतिमा आउन नमिल्ने निष्कर्ष निकालेको प्रचार विभाग राजेन्द्र गौतमले बैठकपछि जानकारी दिए ।
‘पूर्व राष्ट्रपति देशको राष्ट्राध्यक्ष, राष्ट्रिय एकताको सिम्वोल, देशको अभिभावक हो’, बैठकको निर्णय सुनाउँदै गौतमले भने, ‘यस्तो व्यक्ति राजनीतिक दलको नेता कार्यकर्ता हुने कुरा स्थापित मूल्यमान्यता अनुसार हुँदैन । यसले संविधान, मर्म र भावना विपरीत हुन्छ भन्ने निष्कर्ष निकालेको छ ।
यसैबीच पूर्व राष्ट्रपति भण्डारीलाई राजनीतिमा फर्कन रोक लगाउने पार्टीको निर्णयमा एमालेका तीन जना नेताले भने असहमति जनाएका छन् ।एमालेका उपाध्यक्षद्वय सुरेन्द्र पाण्डे, युवराज ज्ञवाली र कर्ण थापाले फरक असहमति जनाएका हुन् ।