वीरगन्ज,५साउनःवीरगन्ज महानगरपालिका वडा नम्बर १९ विन्दवासिनीस्थित तिलावे नदिको किनारमा रहेको सार्वजनिक जग्गामा महानगरपालिकाले अतिक्रमणमुक्त गरेर वृक्षारोपणका लागि लगाएको तारबारसहितको पोलहरु अज्ञात समुहले उखलेर फालि दिएको छ ।
तिलावे नदिको किनारमा रहेको सार्वजनिक जग्गा स्थानीय केहि व्याक्तिहरुले वर्षौदेखि जबरजस्ति कब्जामा लिएर खनजोत गर्दै उपभोग गर्दै आएका थिए ।महानगरका मेयर राजेशमान सिंहको निर्देशनमा गत असारमा महानगरपालिकाका नगरप्रहरीसहितको टोलीले ७ बिघा क्षेत्रफलको उक्त जग्गालाई अतिक्रमण मुक्त गरेर त्यहाँ वृक्षारोपणका लागि तारबार लगाएको थियो ।
वृक्षारोपणका लागि तयारी भइरहेको अवस्थामा स्थानीय केहि उच्छृंखल व्याक्तिहरुले उक्त जग्गामा महानगरले गाडेको सिमेण्टको पोल र तारबार उखलेर फालिदिएको अवस्थामा भेटिएको महानगरका मेयर सिंहले जानकारी दिए । महानगरले उक्त जग्गामा वृक्षा रोपणका लागि भनेर ८० वटा सिमेण्टको पोल गाडेर तारबार गरेकामा ३४ वटा पोल र तारबार उखलेर फालिएको अवस्थामा भेटिएको उनले बताए ।
मेयर सिंहका अनुसार ,महानगरपालिकाले पोल र तारबार उखलेर फाल्ने कार्यमा संलग्नहरुलाई तत्काल पक्राउ गरेर कारबाहीको माग गर्दै जिल्ला प्रहरी कार्यालय पर्सामा सोमबार उजुरी दिएको छ ।मेयर सिंहले भने,‘ ती अराजक र उच्छृंखल मान्छेहरुको पहिचान त भइसकेको छैन । तर जसले सार्वजनिक जग्गा वर्षौदेखि जबरजस्ति कब्जा गरेर खनजोत गर्दै आएका थिए,शायद उनिहरुले नै यो काम गरेको हुनुपर्छ ।’
सार्वजनिक सम्पत्तिको संरक्षण र वातावरणीय सुधारका लागि महानगरले सुरु गरेको वृक्षारोपण अभियानमा नियोजित रूपमा अवरोध पु¥याइएको भन्दै मेयर सिंहले भने,‘ यस्ता आपराधिक गतिविधिमा संलग्न जो सुकै भएपनि तीनलाई कानुनी दायरामा ल्याउन महानगरले स्थानीय प्रशासनमा आवश्यक प्रकृया सहित उजुरी दर्ता गरिसकेको छ।,जो भएपनि प्रहरीले तत्काल पक्राउ गरेर कारबाही गर्नुपर्छ ।’ वीरगन्जको विकास र समृद्धि नरुचाएकाहरुले उक्त अराजक काम गरेको हुनसक्ने उनको भनाई छ ।