वीरगन्ज,३असार: एड्स हेल्थकेयर फाउण्डेशन (एएचएफ) नेपालको सहकार्यमा वीरगन्ज महानगरपालिकाको सभाकक्षमा स्थानीय/नगर परियोजना परामर्श समितिको बैठक सम्पन्न भएको छ । बैठकमा नारायणी अस्पतालमार्फत प्रदान गरिँदै आएको एचआईभी एड्स संक्रमितहरुको उपचार सेवाबारे जानकारी प्रस्तुत गरिएको थियो ।
बैठकमा एएचएफ नेपालकी एआरटी काउन्सिलर रोशनी सर्राफले प्रस्तुति दिँदै नारायणी अस्पतालको एआरटी सेन्टरमार्फत हाल १ हजार ५०१ जना एचआईभी संक्रमितले निःशुल्क उपचार सेवा लिइरहेको जानकारी दिइन् । उनका अनुसार नारायणी अस्पतालबाट सेवा लिने संक्रमितहरू पर्सा, बारा, रौतहट, मकवानपुर, सर्लाही र धनुषा लगायतका जिल्लासँगै सीमावर्ती शहर भारतका पनि रहेका छन् । एएचएफ नेपालको कार्यमा वीरगन्ज महानगरपालिकाले प्रयोगशालाको परीक्षणमा गरेको सहयोगप्रति पनि सर्राफले आभार प्रकट गरिन् ।
छलफलको क्रममा छिमेकी राष्ट्र भारतका संक्रमितको सेवा प्रवाहमा भइरहेको जटिलतालाई सहजीकरण गर्नुपर्नेमा वक्ताहरुले जोड दिएका थिए । दुवै सीमाका सरोकारवालाको पहलमा उनीहरुलाई पनि उपचारको दायराभित्र ल्याउनुपर्ने निस्कर्ष बैठकले निकालेको छ ।
बैठकमा जिल्ला समन्वय समिति पर्साका प्रमुख निरन्जन साह सोनारले अझै पनि धेरै संक्रमित उपचारको पहुँचमा पुग्न नसकेको भन्दै सबै संक्रमितलाई सेवाको दायरामा ल्याउनुपर्ने आवश्यकता औँल्याए । नारायणी अस्पतालका मेडिकल सुपरिन्टेन्डेन्ट डा. चुमनलाल दासले सेवा प्रवाहमा कुनै कसर बाँकी नराख्ने प्रतिबद्धता जनाउँदै, कोही पनि उपचारबाट बञ्चित नहोस् भन्ने उद्देश्यले अस्पतालले आवश्यक सबै प्रकारको सहयोग गर्ने बताए ।
नयाँ जीवन विकास सेवा समाजका एड्भोकेसी अफिसर जाबेद आलम पठानले उपचारको लागि भइरहेको भाइरल लोडको अभावलाई आफ्नो संस्थाले सहयोग गर्ने प्रतिबद्धता जनाए । त्यस्तै उनले संक्रमित भएका बालबालिकालाई पनि प्रति महिना दुई हजार रुपैयाँ सहयोग प्रदान गर्दै आएको जानकारी गराए ।
यस अवसरमा एआरटी फोकल पर्सन डा. अतुलेश कुमार चौरसिया, नारायणी अस्पतालकी नर्सिङ प्रमुख श्रुति साह, वीरगन्ज महानगरपालिकाका कर्मचारी लगायतको सहभागीता रहेकाे एएचएफ नेपालका अंकित गुप्ताले जानकारी दिए । बैठकमा वार्षिक रूपमा परियोजनाको प्रगति विवरण पनि प्रस्तुत गरिएको थियो ।