वीरगन्ज,३०जेठःभारतबाट हुण्डीको रकम लिएर आउँदै गरेका दुई जनालाई सशस्त्र प्रहरीले वीरगन्ज भन्सार क्षेत्रबाट पक्राउ गरेको छ । १८ लाख रुपैयाँसहित दुई जनालाई सशस्त्र प्रहरीले वीरगन्ज भन्सार क्षेत्रबाट शुक्रबार पक्राउ गरेको हो ।
पक्राउ पर्नेहरुमा पर्साको वीरगन्ज महानगरपालिका वडा नम्बर २ छपकैयाका १९ वर्षीय राहुल तिवारी र बाराको प्रसौनी गाँउपालिका वडा नम्बर २ प्रसौनीका ४० वर्षीय कौशल कुमार गुप्ता रहेका छन् । तिवारीको साथबाट १३ लाख रुपैयाँ र गुप्ताको साथबाट ५ लाख रुपैयाँ नगद बरामद भएको सशस्त्र प्रहरी नायब उपरीक्षक देबेन्द्रबहादुर सिंहले जानकारी दिए ।
सिंहका अनुसार, शुक्रबार विशेष सूचनाको आधारमा सशस्त्र प्रहरीको टोलीले वीरगन्ज भन्सार कार्यालय अगाडिको सडकमा भारतको रक्सौलबाट आउँदै गरेको तिवारी सवार बीआर ०५ ए टी ०४७५ नम्बरको मोटरसाइकल रोकेर चेकजाँच गरेको थियो । त्यसक्रममा उक्त मोटरसाइकलको एयर फिल्टर बक्सभित्र लुकाएर राखिएको अवस्थामा नेपाली १३ लाख रुपैयाँ भेटिएको र उक्त रकमको श्रोत खुल्न नसकेपछि रकम र मोटरसाइकलसहित तिवारीलाई नियन्त्रणमा लिइएको सशस्त्र प्रहरी नायब उपरीक्षक सिंहले बताए ।
यस्तै शुुक्रबार नै वीरगन्ज भन्सार कार्यालय नजिकैको सडकमा सशस्त्र प्रहरीले रक्सौलबाट वीरगन्ज आउँदै गरेको गुप्ता सवार ना ४७ प ९७१० नम्बरको मोटरसाइकल रोकेर गुप्ताको शरिर खानतलासी गरेको थियो । त्यसक्रममा गुप्ताको शरिरका विभिन्न भागमा लुकाएर राखिएको अवस्थामा नेपाली पाँच लाख रुपैयाँ भेटिएको हो । गुप्ताले उक्त रकमको श्रोत खुलाउन नसकेपछि रकम र मोटरसाइकलसहित गुप्तालाई पनि नियन्त्रणमा लिइएको सशस्त्र प्रहरी नायब उपरीक्षक सिंहले बताए ।
बरामद रकम, मोटरसाइकल सहित पक्राउ परेका तिवारी र गुप्तालाई अनुसन्धान तथा कारबाहीका लागि शुक्रबार नै वीरगन्ज भन्सार कार्यालयमा बुझाइएको सिंहले जानकारी दिए ।