वीरगन्ज, ६जेठ :युवा संस्थाले वीरगन्मा विगत चार वर्षदेखि सञ्चालन गरिरहेको यूथ एक्सेस परियोजनाअन्तर्गत मंगलबारदेखि “गर्भपतन सम्बन्धी मूल्यमान्यता प्रष्टीकरण र व्यवहार रूपान्तरण (भी-क्याट)” विषयक चारदिने तालिम सुरु भएको छ ।
वीरगन् महानगरपालिकाअन्तर्गतका विभिन्न स्वास्थ्य संस्थाहरूमा कार्यरत महिला स्वास्थ्यकर्मीहरूलाई लक्षित तालिमले सुरक्षित गर्भपतन सेवालाई थप प्रभावकारी बनाउने र स्वास्थ्यकर्मीहरूको क्षमता अभिवृद्धि गर्ने उद्देश्य राखेको छ ।
तालिमको उद्घाटन प्रमुख अतिथि तथा वीरगन्ज महानगरपालिका – १० वडाध्यक्ष सुशील कुमार कानुले गरेका हुन् । उद्घाटन समारोहमा बोल्दै वडाध्यक्ष कानुले तालिमले स्वास्थ्यकर्मीहरूको पेसागत दक्षता अभिवृद्धि गर्नुका साथै सुरक्षित गर्भपतन सेवालाई समुदायमा थप पहुँचयोग्य र संवेदनशील बनाउन महत्त्वपूर्ण योगदान पुर्याउने बताए । “प्रजनन स्वास्थ्य र महिलाको अधिकारका लागि यस्ता कार्यक्रमले समाजमा सकारात्मक परिवर्तन ल्याउनेछ,” उनले भने ।
कानुले यूथ एक्सेस परियोजनाको पहललाई प्रशंसा गर्दै स्थानीय सरकारको तर्फबाट यस्ता कार्यक्रमलाई निरन्तर सहयोग रहने प्रतिबद्धता व्यक्त गरे ।
उद्घाटन कार्यक्रममा वीरगन्ज महानगरपालिकाको स्वास्थ्य प्रशासन महाशाखाका पब्लिक हेल्थ अफिसर रितेश जयसवालको पनि उपस्थिति थियो । उनले तालिमको महत्वमाथि प्रकाश पार्दै गर्भपतन सम्बन्धी सामाजिक र सांस्कृतिक पूर्वाग्रहहरू हटाउन र स्वास्थ्यकर्मीहरूमा संवेदनशीलता विकास गर्न तालिम अत्यन्तै महत्त्वपूर्ण रहेको बताए । “हाम्रा स्वास्थ्यकर्मीहरूले तालिमबाट प्राप्त ज्ञान र सीपलाई समुदायमा लागू गरेर सुरक्षित गर्भपतन सेवालाई प्रभावकारी बनाउनेछन् ।”
त्यस्तै, इन्दिरा लोहनीले स्वास्थ्यकर्मीहरूको भूमिका र गर्भपतन सेवामा उनीहरूको संवेदनशील दृष्टिकोणको आवश्यकताबारे जोड दिँदै स्वास्थ्यकर्मीहरूले सेवाग्राहीहरूसँग संवाद गर्दा देखाउने संवेदनशीलता र नैतिक दृष्टिकोणले सेवाको गुणस्तरमा ठूलो प्रभाव पार्ने बताउँदै तालिमले त्यस दिशामा महत्त्वपूर्ण योगदान दिने विश्वास व्यक्त गरिन्।
चार दिने तालिममा वीरगन्ज महानगरपालिकाअन्तर्गतका विभिन्न स्वास्थ्य संस्थाहरूमा कार्यरत २६ जना महिला स्वास्थ्यकर्मीहरू सहभागी छन् । तालिमको प्रमुख प्रशिक्षकको रूपमा काठमाडौँकी प्रशिक्षक पुष्पा जोशीले सहजीकरण गरिरहेकी छन् । जोशीले गर्भपतन सम्बन्धी नीतिगत व्यवस्था, सुरक्षित गर्भपतनका प्राविधिक पक्ष, र सेवाग्राहीहरूसँग संवेदनशील संवादका लागि आवश्यक सीपहरूबारे गहन प्रशिक्षण प्रदान गरिरहेकी छन् । सहभागीहरूलाई वास्तविक परिस्थितिमा प्रभावकारी रूपमा काम गर्न सक्षम बनाउने अपेक्षासहित तालिममा सैद्धान्तिक ज्ञानका साथै व्यावहारिक अभ्यास, समूह छलफल, र केस स्टडीहरू समावेश गरिएको छ ।
उद्घाटन कार्यक्रमको अध्यक्षता यूथ एक्सेस परियोजनाका स्थानीय संयोजक आशु कुमार सर्राफले गरेका थिए । उनले तालिमको उद्देश्यबारे बोल्दै परियोजनाको मुख्य लक्ष्य भनेको प्रजनन स्वास्थ्यमा पहुँच र गुणस्तर सुनिश्चित गर्नु रहेको बताए । “तालिमले स्वास्थ्यकर्मीहरूमा गर्भपतनप्रति सकारात्मक दृष्टिकोण विकास गर्न र उनीहरूको सेवा प्रदान गर्ने शैलीमा सुधार ल्याउन सहयोग गर्नेछ,” उनले भने । तालिमले स्थानीय स्वास्थ्य सेवालाई थप समावेशी र प्रभावकारी बनाउने उनले विश्वास पनि व्यक्त गरे ।
यूथ एक्सेस परियोजनाले विगत चार वर्षदेखि वीरगन्जमा प्रजनन स्वास्थ्य, युवा सशक्तीकरण, र स्वास्थ्य सेवामा पहुँच वृद्धिका लागि विभिन्न कार्यक्रमहरू सञ्चालन गर्दै आइरहेको छ । तालिमले स्वास्थ्यकर्मीहरूको क्षमता अभिवृद्धि गर्नुका साथै समुदायमा सुरक्षित गर्भपतन सम्बन्धी जागरूकता फैलाउन पनि सहयोग पुर्याउनेछ । स्वास्थ्यकर्मीहरूको आत्मविश्वास र कार्यक्षमता बढाउँदै तालिमले गर्भपतन सम्बन्धी नीतिगत र कानुनी पक्षहरू, बिरामीहरूसँगको संवादमा संवेदनशीलता, र प्राविधिक प्रक्रियाहरूबारे गहिरो समझ प्रदान गर्नेछ ।