प्रमोद यादव
पर्सा,१८कार्तिकःपर्साको पटेर्वा सुगौली गाँउपालिका वडा नम्बर ४ बाट लागू औषध गाँजा र चरेससहित एउटा मोटरसाइकल प्रहरीले बरामद गरेको छ ।
ईलाका प्रहरी कार्यालय पटेर्वा सुगौलीबाट शनिबार बेलुकी खटिएको प्रहरी टोलीले वडा नम्बर ४ स्थित भलुवाही खोलाको बाँध नजिक चेकजाँच गर्ने क्रममा गाँजा ५ केजी र चरेस १ केजी सहित बीआर २२ बीए ९१५८ नम्बरको मोटरसाइकल बरामद गरेको हो ।
प्रहरी निरीक्षक मोहनजंग बुढा थापाका अनुसार, प्रहरीले बाँध नजिक चेकजाँचका क्रममा सुगौलीबाट निचुटा तर्फ आउँदै गरेको उक्त मोटरसाइकललाई रोकेपछि त्यसका चालक भने मोटरसाइकल र झोला छाडेर भागेका थिए । त्यसपछि उक्त मोटरसाइकलमा रहेको झोला खोलेर हेर्दा त्यसभित्र गाँजा ५ केजी र चरेस १ केजी बरामद भएको थापाले बताए ।
लागू औषधसहित बरामद मोटरसाइकल प्रहरी कार्यालयमा ल्याएर राखिएको र मोटरसाइकलका चालकको खोजी भइरहेको प्रहरी निरीक्षक थापाले जानकारी दिए ।