वीरगन्ज,२असोजःपर्साको ग्रमीण भेगको नाका हुदैं भारतबाट अवैध रुपमा भित्रयाइएको पटका सशस्त्र प्रहरीले बरामद गरेर नष्ट गरेको छ । वीरगन्ज–पोखरिया सडकखण्डमा चेकजाँचमा खटिएको सशस्त्र प्रहरीको टोलीले १ लाख रुपैयाँ भन्दा बढी मूल्यको पटका बरामद गरेर नष्ट गरेको हो ।
सशस्त्र प्रहरी बल नेपाल सुरक्षा बेस क्याम्प बहुअर्वाभाठाबाट सशस्त्र प्रहरी नायब निरीक्षक तोयानाथ आचार्यको नेतृत्वमा खटिएको टोलीले बुधबार बिहान उक्त पटका बरामद गरेको थियो । पोखरीयाबाट वीरगन्ज आँउदै गरेको नम्बर खुल्न नसकेको मोटरसाइकललाई चेकजाँचका लागि सशस्त्र प्रहरीले रोक्न खोज्दा मोटरसाइकल चालक पटाकाको प्लाष्टिकको बोरा फयाँकेर फरार भएका थिए ।
उक्त प्लाष्टिकको बोरा खोलेर हेर्दा त्यसमा विभिन्न ब्राण्डका पटाकाहरु भेटिएपछि उक्त पटाका नेपाल प्रहरी, राजनीतिक दलका प्रतिनिधी र सञ्चारकर्मीहरुको रोहबरमा खाल्डोमा पुरेर नष्ट गरिएको सशस्त्र प्रहरी नायब निरीक्षक आचार्यले जानकारी दिए।