वीरगन्ज,३०भदौंःबारामा आइतबार तेरापंथ युवक परिषदले आयोजना गरेको रक्तदान शिविरमा ११६ जनाले रगतदान गरेका छन् । परिषदले १५ सय पोका रगत संकलनका लागि थालेको ११ दिने बृहत रक्तदान शिविर अन्तर्गत आइतबार बाराको छातापिपरास्थित त्रिवेणी ग्रुपमा आयोजित कार्यक्रममा ८ महिलासहित ११६ जनाले रक्तदान गरेका हुन् ।
रक्तदान गर्नेहरुमा नमु थापा,रूपावती चौधरी,लक्ष्मी तिमल्सिना,शालीनी चौधरी,चन्द्रला राइ, मनिषा गौतम,विवेकक चौधरी,संसार गिरी, अनील साह, राजेशप्रसाद पटेल लगायतका रहेको कार्यक्रमका सह–संयोजक नरेश भन्सालीले जानकारी दिए ।
आइतबारको रक्तदान कार्यक्रममा परिषदका अध्यक्ष लोकेश जम्मड ,मानव अधिकारकर्मी राजेश जैन बोथरा लगायतको सहभागीता थियो ।११ दिने अभियान अन्तर्गत आइतबारसम्म ७ सय ६६ पोका रंगत संकलन भइसकेको अध्यक्ष जम्मडले बताए । यसअघि शनिबार वीरगन्जको तेरापंथ भवनमा आयोजित कार्यक्रममा २ सय ११ जनाले रक्तदान गरेका थिए ।