नयाँ दिल्ली : भारतमा गर्मीका कारण दिनहुँ मृत्युका कयौं घटना बाहिर आइरहेका छन् । उत्तर प्रदेशमा बुधबार एकै दिन गर्मीका कारण ५१ जनाको मृत्यु भएको छ ।उत्तर प्रदेशको बुन्देलखण्डमा अत्यधिक गर्मीका कारण ३१ जनाको ज्यान गएको छ । जसमा महोबामा ८ जनाको, हमीरपुरमा ७७ जनाको,चित्रकूटमा ६ जनाको , फतेहपुरमा ५ जनाको, बान्दामा ३ जनाको र जलौनमा २ जनाको मृत्यु भएको छ ।
मृतकहरूमध्ये अधिकांश कुनै कामको लागि घर बाहिर निस्कँदा बाटोमा बेहोस भएका थिए । अस्पताल पुग्नुअघि नै उनीहरुको मृत्यु भइसकेको थियो । बहराइचको नानपारा र कैसरगञ्ज तहसिल क्षेत्रमा गर्मीका कारण २ जनाको मृत्यु भएको छ । यस्तै प्रयागराजमा एक प्रहरी सहायक निरीक्षकसहित ४ जनाको मृत्यु भएको छ ।
ग्रेटर नोएडामा मेरठका एक वृद्धको गर्मीले मृत्यु भएको छ । बलियामापनि एक महिलाको मृत्यु भएको छ । वाराणसीमा ६ जनाको, मिर्जापुरमा ३ जनाको, आजमगढ, जौनपुर र सोनभद्रमा १–१ जनाको मृत्यु भएको बताइएको छ । यी सबैको मृत्यु हिटस्ट्रोकका कारण भएको हुनसक्ने आशंका गरिएको छ । मृत्युको वास्तविक कारण पोस्टमार्टमपछि मात्र खुल्ने बताइएको छ ।साभारः रातोपाटीबाट