बारा,१०पुष:बाराको कलैयामा झन्डै दुई महिना अगाडि बालएकता बोर्डिङ स्कुलका प्रधानाध्यापक रूपेश स्वर्णकारको गोली हानी हत्या गरेको आरोप लागेका मुख्य सुटर सुजित सिंहलाई प्रहरीले पक्राउ गरेकाे छ ।
स्वर्णकारको हत्या गर्ने समूहका मुख्य नाइकेका रूपमा रहेका सुजित सिंहलाई बारा प्रहरीले मंगलबार पक्राउ गरेको हो ।
जिल्ला प्रहरी कार्यालय बाराको स्रोतका अनुसार सिंहलाई भारतीय सीमासँग जोडिएको छतवा मुसहर्वा नाकाबाट पक्राउ गरिएकाे हाे । उनलाई पक्राउ गर्ने क्रममा गोली समेत प्रहार गरिएको बारा प्रहरी स्रोतले जनाएको छ ।प्रहरी स्रोतका अनुसार सिंहलाई नियन्त्रणमा लिने क्रममा प्रहरीले उनको घुँडाभन्दा मुनि गोली हानेको छ ।
भारत बिहार राज्यको तीनकोनी गाउँका ३५ वर्षीय सिंह दुवै खुट्टामा गोली लागेर घाइते भएकाे र उनकाे प्रादेशिक अस्पताल कलैयामा प्रहरीको निगरानीमा उपचार भइरहेको छ ।
प्रहरीले सिंहको साथमा रहेको बन्दुक र त्यसमा लाग्ने गोलीसमेत बरामद गरेको जनाएको छ । सिंह हतियारसहित नेपाल प्रवेश गरेको सूचनापछि खटिएको प्रहरी टोलीले नियन्त्रणमा लिएको प्रहरी अधिकारीको भनाइ छ ।
सिंहलाई मंगलबार साँझ नियन्त्रणमा लिइएको बारा प्रहरीका प्रमुख प्रहरी उपरीक्षक सुरेश प्रसाद काफ्लेले पनि पुष्टि गरे ।
सिंहको समूहले गत कार्तिक १३ गतेका दिन प्रिन्सिपल स्वर्णकारलाई बाल एकता स्कुल नजिकै रहेको मदरसा अगाडिकाे सडकमा गोली हानेर हत्या गरेको थियो । टाउको र घाँटीमा गोली लागेर गम्भीर रूपले घाइते भएका स्वर्णकारको वीरगन्जस्थित नेपाल मेडीसिटी बयोधा अस्पतालमा त्यहि दिन उपचारका क्रममा मृत्यु भएको थियो ।
पक्राउ परेका सिंहको यसअघि पनि बारा जिल्लामा भएका अन्य गोली काण्डहरूमा संलग्नता रहेकाे प्रहरीको दाबी छ ।