वीरगन्ज,१मंसिरः नेपाली काँग्रेस पर्साका पूर्व उपसभापति अशोक जयसवालको निधन भएको छ ।झन्डै सात वर्षदेखि ‘एमएन्डी’ नामक रोगले ग्रसित ५५ वर्षिय जयसवालको वीरगन्जस्थित नेपाल मेडीसिटी वयोधा अस्पतालमा उपचारका क्रममा मृत्यु भएको परिवार निकट स्रोतले जनाएको छ ।
रोगका कारण जयसवाल लामो समयदेखि शारीरिक रूपमा अशक्त भइसकेका थिए । यद्यपि चिकित्सकहरूको निगरानीमा भने उनको उपचार चलिरहेको थियो ।
अचानक स्वास्थ्यमा समस्या आएपछि उनलाई अस्पतालमा भर्ना गरिएको र उपचारको क्रममा उनको निधन भएको अस्पताल प्रशासनले जनाएको छ ।
काँग्रेस पर्साका पूर्व सचिव समेत रही सकेका जयसवाल पर्साको रामनगरी निवासी भए पनि उनी वीरगन्ज – ११ रानीघाटमा बस्दै आएका थिए । उनका दुई छोरा र तीन छोरी छन् ।