मधेसखबर
वीरगन्ज ,३०फागुन : वीरगन्जको ठाकुरराम बहुमुखी क्याम्पसमा स्ववियु निर्वाचनका विषयमा उत्पन्न विवाद सुल्झाउन मङगलबार साँझ बसेको सर्वपक्षीय बैठक निष्कर्ष बिहिन भएको छ । जिल्ला प्रशासन कार्यालय पर्सामा बसेको सर्वपक्षीय बैठकमा सहमति नजुटेपछि निष्कर्ष बिहिन भएको हो ।
प्रमुख जिल्ला अधिकारी हिरालाल रेग्मीको उपस्थितीमा बसेको बैठकमा चार घण्टा सम्म छलफल भएपनि निष्कर्ष निस्किदा बुधबार बिहान ८ बजे फेरि बस्ने गरि बैठक सकिएको बैठकमा सहभागी नेपाली काँग्रेस पर्साका सहसचिव नवीन सिंहले जानकारी दिए ।
बुधबार बिहान ८ बजे फेरि बैठक बस्ने स्ववियु निर्वाचनका बारेमा ठोस निर्णय गरिने उनले बताए । मङगलबार बेलुकी ८ बजे सम्म चलेको बैठकमा सोमबार निर्वाचन समितिले सार्वजनिक गरेको मतदाता नामावलीमा त्रूटी रहेको र त्यस बारे छानबिन गरि सच्याउनु पर्ने विषयमा छलफल भएपनि निष्कर्ष भने निस्किन नसकेकाले बुधबार बिहान फेरि बैठक बस्ने सहमति भएको सिंहले बताए ।
बैठकमा प्रजिअ रेग्मीसंगै क्याम्पस प्रमुख डाक्टर उमेश चौरसिया , निर्वाचन अधिकृत रोशन लामिछाने ,नेकपा एमालेका पर्सा जिल्ला संयोजक डाक्टर विश्वम्भर शर्मा , जसपााका जिल्ला अध्यक्ष रामनरेश प्रसाद यादव , जिल्ला सचिव तबरेज अहमद , नेकपा माओवादी केन्द्रका नेता रामदरश कुशवाहा , युवा नेता प्रभाकर गुप्ता , काँग्रेस पर्साका सचिव इम्तियाज आलम, सहसचिव नवीन सिंह , जनमत पार्टीका नेता मुकेश द्धिवेदी , नागरिक उन्मुक्ति पार्टीका निरन्जन चौधरी लगायतको सहभागिता थियो ।
स्ववियु निर्वाचनका लागि निर्वाचन समितिले सोमबार प्रकाशन गरेको संशोधित निर्वाचन तालिका अनुसार , मंगलबार मनोनयन पत्र वितरण र बुधबार मनोयन पत्र दाखिलाको कार्यक्रम तय थियो । मतदान भने चैत ८ गते हुने निर्वाचन तालिकामा उल्लेख थियो ।
तर सोमबार निर्वाचन समितिले जारी गरेको ९ हजार ७ सय मतदाताको नामावली प्रति विरोध जनाउदै मंगलबार बिहान विधार्थी संगठनहरुले फोटो सहितको मतदाता नामावली प्रकाशन गर्नु पर्ने माग राखेर क्याम्पसको विभिन्न शाखामा तालाबन्दी गरिदिएका थिए । जसका कारण मंगलबार मनोनयनपत्र वितरण कार्य नै हुन सकेन । त्यसपछि निर्वाचन समितिले तत्काल निर्वाचन कार्यतालिका स्थगीत गरेर यस बारेमा जिल्ला प्रशासन कार्यालयमा सर्वपक्षीय बैठकमा छलफल गर्ने जानकारी विधार्थी संगठनहरुलाई गराएको थियो । तर सर्वपक्षीय बैठकमा पनि मंगलबार निष्कर्ष निस्कन नसकेपछि चैत ८ मा निर्धारित निर्वाचन नै अब हुने किन नहुने भन्ने अन्यौल थप बढेको छ ।
यता स्ववियु निर्वाचन , निर्वाचन समितिले तोकेको मिति चैत ८ मै निष्पक्ष ढंगबाट हुनु पर्ने माग राख्दै विधार्थी संगठनहरुले मङगलबार साँझ देखि संयुक्त रुपमा क्याम्पस परिसरमै अनशन शुरु गरेका छन् ।
अनसनमा बसेका विधार्थी नेताहरुले निर्वाचन समितिले ठोस निर्णय नगरे सम्म अनसन जारी नै राख्ने अडान पनि लिएका छन् ।
अनसनमा बसेका नेविसंघका तर्फबाट सभापतिका प्रत्याशी मुनराज तिवारीले केहि अराजक तत्वले हार्ने डरले स्ववियु निर्वाचन भाँड्ने नियतले अनेक षडयन्त्र गरिरहे पनि आफुहरुले उनिहरुको षडयन्त्र पुरा हुन नदिने बताए । उनले भने ,‘ स्ववियु निर्वाचन चैत ८ मै हुनुपर्छ , यदि कसैले चुनाव भाँड्ने हर्कत गर्छ भने हामी सशक्त प्रतवादमा उत्रिन्छौ ।
अखिल क्रान्तिकारीका केन्द्रीय सचिवालय सदस्य शीवम साहले भने स्ववियु निर्वाचन निस्पक्ष र यथावत मिति (चैत८) मै हुनु पर्ने आफुहुरुको माग रहेको बताए ।