वीरगन्ज,३असाेज: वीरगन्जको घण्टाघरस्थित बीपी उद्यान पार्कभित्र रहेको पुरानो रेल्वे क्षेत्रलाई व्यवस्थित गर्दै रेल्वे पार्कका रूपमा विकास गर्ने योजना अघि बढाइएको छ । पार्कभित्रको रेल्वे क्षेत्रमा पुनः सरसफाइ तथा व्यवस्थापनको काम सुरु गरिएको हो ।
वीरगन्जज महानगरपालिकाका मेयर राजेशमान सिंहको निर्देशनमा शनिबार पार्कभित्रकाे रेल्वे क्षेत्रको सरसफाइ गरिएको हो । पार्कभित्र तीन महिनादेखि झाडी तथा फोहोरका कारण अस्तव्यस्त बनेको रेल्वे क्षेत्रमा सरसफाइ गरी आगामी दिनमा रेल्वे पार्क निर्माणको काम अघि बढाउने तयारी महानगरले गरेको छ ।
बीपी उद्यानलाई वीरगन्ज शहरको प्रमुख हरित तथा सार्वजनिक मनोरञ्जन क्षेत्रका रूपमा विकास गर्ने महानगरको योजनाअन्तर्गत पार्कभित्र रहेका विभिन्न संरचना तथा क्षेत्रलाई व्यवस्थित गर्ने काम हुँदै आएको थियो । त्यसमध्ये रेल्वे क्षेत्रलाई ऐतिहासिक महत्व झल्किने तथा वीरगन्जको पहिचानसँग जोडिने गरी रेल्वे पार्कका रूपमा विकास गर्ने अवधारणा महानगरका मेयर सिंहले अघि सारेका थिए ।
रेल्वे पार्क निर्माणको प्रारम्भिक तयारीस्वरूप क्षेत्रको सरसफाइ, झाडी हटाउने तथा खाली स्थानलाई व्यवस्थित गर्ने काम अघि बढाइएको थियो । कामले गति लिइरहेका बेला गत जेठ २५ गते मेयर सिंह निलम्बनमा परेपछि पार्कभित्रको सरसफाइ तथा व्यवस्थापनको काम रोकिएको थियो । काम रोकिएपछि रेल्वे क्षेत्र पुनः झाडी र फोहोरले ढाकिँदै गएर अस्तव्यस्त बनेको थियो ।
सिंहले गत सोमबार विशेष अदालतबाट सफाइ पाएसँगै महानगरका रोकिएका कामलाई पुनः गति दिन थालेका छन् । त्यसक्रममा वीरगन्जको सरसफाइ अभियानलाई तीव्रता दिनुका साथै वीपी उद्यानको रोकिएको कामलाई समेत अघि बढाउन निर्देशन दिइएको महानगरले जनाएको छ ।
रेल्वे क्षेत्रको सरसफाइसँगै अब पार्कको उक्त भागलाई थप व्यवस्थित बनाउँदै रेल्वे पार्क निर्माणको योजनालाई अघि बढाउने तयारी गरिएको छ ।
पार्कलाई हरियाली, मनोरञ्जन तथा ऐतिहासिक पक्षसँग जोडेर विकास गर्ने महानगरको योजनाअनुसार क्रमशः अन्य कामसमेत अघि बढाइएकाे मेयर सिंहले जानकारी दिए ।
वीरगन्जको मुख्य तथा व्यस्त क्षेत्र घण्टाघर नजिकै रहेको बीपी उद्यानलाई व्यवस्थित र आकर्षक सार्वजनिक पार्कका रूपमा विकास गर्ने महानगरको योजना रहेकाे मेयर सिंहले बताए । पार्कको व्यवस्थित विकाससँगै सर्वसाधारणका लागि खुला तथा मनोरञ्जनको उपयुक्त स्थलका रूपमा स्थापित गर्ने लक्ष्य महानगरले लिएको छ ।
रेल्वे क्षेत्रमा शनिबार गरिएको सरसफाइ कार्यक्रममा महानगरपालिकाका मेयर सिंह, प्रमुख प्रशासकीय अधिकृत बसन्तबहादुर बोहोरा, महानगरपालिकाका सरसफाइ तथा हरियाली संयोजक जयप्रकाश खेतानलगायतको सहभागिता रहेको थियो ।