वीरगन्ज,१६साउन:पर्सामा प्रहरीले स्रोत नखुलेको भारतीय रुपैयाँ र मोटरसाइकलसहित दुई जनालाई नियन्त्रणमा लिएको छ।
ईलाका प्रहरी कार्यालय जानकीटोलाबाट खटिएको प्रहरीकाे टोलीले जगननाथपुर गाउँपालिका- २ स्थित गण्डक नहर सडकखण्डबाट उनीहरूलाई पक्राउ गरेकाे हाे ।
पक्राउ पर्नेहरूमा मकवानपुरकाे राक्सिराङ गाउँपालिका-२ घर भई हाल चितवनकाे माडी नगरपालिका-९ हनुमानझुला बस्ने ४२ वर्षीय दिपेश हिमडुङ र त्यही ठाउँका २६ वर्षीय तिलक हिमडुङ रहेका छन्।
प्रहरीले ना. १० प ४४६९ नम्बरको मोटरसाइकल रोकेर जाँच गर्ने क्रममा उनीहरूको साथबाट स्रोत नखुलेको भारतीय २ लाख ९ हजार ५ सय रुपैयाँ बरामद गरेको हो।
भारु ५०० दरका नोट ३१६ थान,२०० दरका नोट ७५ थान र १०० दरका नोट ३६५ थान बरामद भएको प्रहरीले जनाएको छ।
प्रतिबन्धित भारतीय नोट र मोटरसाइकलसहित नियन्त्रणमा लिइएका दुवै जनामाथि थप अनुसन्धान कार्य भइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक चक्र बहादुर मल्लले जानकारी दिए।