वीरगन्ज,१०साउन:वीरगन्जमा रहेकाे एक हाेटलबाट लागू औषधसहित दुई जना पक्राउ परेका छन्।पक्राउ पर्नेहरूमा चितवनकाे रत्ननगर नगरपालिका- ६ का ५२ वर्षीय उत्तम कुमार पाठक र पर्साकाे वीरगन्ज महानगरपालिका-२ का ३५ वर्षीय ओसिम ठकुराई रहेका छन् ।
वीरगन्ज-१६ रजतजयन्ती चोकमा रहेको जय नेपाल होटलको कोठा नंबर ११८ मा लागू औषध बिक्री वितरण भइरहेको विशेष सूचना प्रहरीलाई प्राप्त भएको थियाे।त्यहीँ सुचनाको आधारमा आइतबार बिहान प्रहरी चौकी ईनर्वा र लागू औषध नियन्त्रण ब्यूरो पर्साबाट खटिएको प्रहरीकाे संयुक्त टोलीले उक्त होटलमा पुगेर छापा मारेको थियो।
त्यसक्रममा उक्त काेठामा बसेका पाठक र ठकुराईकाे साथबाट लागू औषध निटकाेर ट्याब्लेट २०० पीस र ओनरेक्स २ बोतल बरामद भएको प्रहरीले जनाएको छ।
लागू औषध बिक्री वितरणमा संलग्न दुवै जनालाई नियन्त्रणमा लिएर थप अनुसन्धान भइरहेको जिल्ला प्रहरी कार्यालय पर्साका प्रहरी नायब उपरीक्षक चक्र बहादुर मल्लले जानकारी दिए।