सिमरा,१२ असारःबाराबाट प्रतिनिधि सभा सदस्यमा निर्वाचित चार सांसदमध्ये दुई जना राष्ट्रिय स्वतन्त्र पार्टीको केन्द्रीय सदस्यमा निर्वाचित हुँदा दुई सांसद पराजित भएका छन् ।
चितवनमा जारी रास्वपाको प्रथम राष्ट्रिय महाधिवेशनबाट केन्द्रिय सदस्यमा बारा क्षेत्र नम्बर ४ का सांसद रहबर अन्सारी र बारा क्षेत्र नम्बर ३ का सांसद अरविन्द साह निर्वाचित भएका हुन् । अन्सारी मुस्लिम समूह र साह मधेसी समूहबाट बिजयी भएका हुन् । अन्सारीले प्रवासको २२ सहित एक हजार ४७ मत प्राप्त गरे । यसैगरी साहले ९ सय ७० मत पाए । साहले प्रवासबाट ६ मत मात्रै पाए ।
रास्वपाका दुई सांसद केन्द्रीय सदस्यमा निर्वाचित हुँदै गर्दा अर्का दुई सांसद भने पराजित भएका छन् । बारा क्षेत्र नम्बर २ का सांसद चन्दन सिंह र बारा क्षेत्र नम्बर १ का सांसद गणेश धिमाल भने पराजित भएका छन् । उनीहरुले भूगोलतर्फबाट केन्द्रीय सदस्यमा उम्मेदवारी दिएका थिए ।साभारः अन्नपूर्णपोष्ट