बारा,२५चैत:बाराको अमलेखगञ्जबाट प्रहरीले झण्डै एक किलो लागूऔषध अफिमसहित दुई जनालाई पक्राउ गरेको छ । पक्राउ पर्नेमा मकवानपुर कैलाश गाउँपालिका–२ का ५५ वर्षीय खड्गबहादुर मोक्तान र ४९ वर्षीय लालबहादुर स्याङ्तान रहेका छन् ।
प्रहरीले उनीहरुको साथबाट ९४६ ग्राम अफिम बरामद गरेको छ । ईलाका प्रहरी कार्यालय सिमराका प्रहरी निरीक्षक दिवाकर गणेश र लागूऔषध नियन्त्रण व्यूरो वीरगन्जका प्रहरी सहायक निरीक्षक गोपाल खड्काको नेतृत्वमा रहेको प्रहरी टोलीले उनीहरुलाई पक्राउ गरेको हो ।
हेटौंडाबाट पैदल हिँडेर सिमरातर्फ आउँदै गरेका उनीहरुलाई अमलेखगञ्जमा रोकेर जाँच गर्ने क्रममा लुगा र झोलामा लुकाएर राखिएको अवस्थामा अफिम बरामद भएको इलाका प्रहरी कार्यालय सिमराले जनाएको छ । पक्राउ परेका दुबैलाई इलाका प्रहरी कार्यालय सिमराको नियन्त्रणमा राखिएको छ।