वीरगन्ज, फागुन १८:बारा निर्वाचन क्षेत्र नम्बर ४ मा राष्ट्रिय स्वतन्त्र पार्टी (रास्वपा)का उम्मेदवार रहबर अन्सारी ले आफू हाल मतदातामाझ अग्र स्थानमा रहेको दाबी गरेका छन्। जारी घरदैलो अभियानका क्रममा विभिन्न गाउँ–टोलमा देखिएको जनसमर्थनका आधारमा यस्तो दाबी गरिएको उनको भनाइ छ।
घरदैलो कार्यक्रमका क्रममा स्थानीयवासीसँग प्रत्यक्ष भेटघाट गर्दै अन्सारीले यसपालि मतदाताको मन–मनमा ‘घण्टी’ छाप बसिसकेको दाबी गरे। उनका अनुसार क्षेत्रका अधिकांश मतदाताले अब परिवर्तन चाहेको र कसलाई मत दिने भन्ने विषयमा स्पष्ट निर्णय गरिसकेको प्रतिक्रिया पाइएको छ।
“जनताले विकास, सुशासन र पारदर्शितालाई प्राथमिकतामा राखेका छन्। अब पुरानै शैलीको राजनीति होइन, परिणाममुखी नेतृत्व चाहिएको छ भन्ने सन्देश घरदैलोका क्रममा स्पष्ट रूपमा सुनिएको छ,” अन्सारीको भनाइ उद्धृत गर्दै उनका समर्थकहरूले बताएका छन्।
घरदैलो अभियानका क्रममा युवाहरूको उल्लेख्य सहभागिता देखिएको जनाइएको छ। स्थानीय बासिन्दाहरूले क्षेत्रको समग्र विकासका लागि युवापुस्तालाई अवसर दिनुपर्ने आवाज उठाइरहेको अन्सारी पक्षको दाबी छ। रोजगारी सृजना, गुणस्तरीय शिक्षा, सुलभ स्वास्थ्य सेवा, कृषि आधुनिकीकरण तथा भौतिक पूर्वाधार विस्तारलाई मतदाताले प्रमुख एजेन्डाका रूपमा अघि सारेको बताइएको छ।
अन्सारीले आफू निर्वाचित भए क्षेत्रको दीर्घकालीन विकास योजनालाई प्राथमिकता दिँदै पारदर्शी र जवाफदेही नेतृत्व दिने प्रतिबद्धता व्यक्त गरेका छन्। “जनताको विश्वासलाई मतमा रूपान्तरण गर्दै बारा–४ लाई विकास र समृद्धिको मार्गमा अघि बढाउने हाम्रो लक्ष्य छ,” उनले बताएका छन्।
निर्वाचन नजिकिँदै जाँदा बारा–४ मा चुनावी गतिविधि तीव्र बन्दै गएको छ। विभिन्न दल तथा उम्मेदवारहरूले घरदैलो, भेटघाट र छलफल कार्यक्रमलाई तीव्रता दिएका छन्। यसैबीच रास्वपा उम्मेदवार अन्सारीले जनताको उल्लेख्य साथ पाएको दाबी गर्दै आफ्नो अभियानलाई अझ सशक्त बनाउने बताएका छन्।