वीरगन्ज,२७माघःपर्सामा चार क्षेत्रमध्ये २ वटा क्षेत्रमा नेकपा एमाललेले नयाँ अनुहारलाई फागुन २१ को निर्वाचनका लागि चुनावी मैदानमा उतारेको छ । तीमध्ये एक हुन् युवा उद्यमी रुपेश पाण्डे । ४९ वर्षीय रुपेश पर्सा क्षेत्र नम्बर ३ मा एमालेका तर्फबाट उम्मेदवार बनेका हुन् ।
बुबा बृजमोहन पाण्डे सकृय राजनीतिमै लागेर २०७४ को स्थानीय तहको निर्वाचनमा कांग्रेसका तर्फबाट पकहाँ मन्पुर गाँउपालिकाको वडा नम्बर २ को वडाध्यक्षमा निर्वाचित भएका थिए । रुपेशको परिवार पहिलेदेखि नै राजनीतिमा सकृय रहेपनि उनलाई भने पहिले राजनीतिप्रति खासै रुची थिएन ।
काठमाडौंस्थित आरपी ग्रुप अफका प्रबन्ध निर्देशक पाण्डे दर्जनौं अन्तर्राष्ट्रिय ब्रान्डका कपडा, जुत्ता र एक्सेसरीज नेपाल भित्र्याउने कारोबारमा जमेर बसेका थिए ।
तर यसअघिका दुई निर्वाचनबाट पर्सा क्षेत्र नम्बर ३ बाट सांसदमा निर्वाचित भएका दुवै सांसद भ्रष्टचारको आरोपमा मुछिएर कार्यकाल पुरा गर्न नपाएपछि त्यो क्षेत्रका जनता निराश थिए । जसका कारण क्षेत्रको विकासले गति लिन सकेन ।
बेलाबेलामा काठमाडौंबाट आफ्नो पुख्र्यौली गाँउघर आउँदा रुपेशले जनतामा नैराश्यता देखे ।कारण– विकास निर्माणका कामहरु लथालिङ्ग थिए । समस्यामा पर्दा कहाँ गएर सुनाउने भरपर्दा र जनताका माझमा रहिरहने आफ्नो जनप्रतिनिधि थिएनन् ।
योसब देखेर रुपेशलाई राजनीतिमा छिरेर जनताको सेवा गर्ने हुटहुटी जाग्यो । अनि उनि काठमाडौंको कारोबारलाई कम र पुख्र्यौली गाँउको बसाईलाई बढी समय बस्न थाले । क्षेत्रका गाँउ गाँउमा डुलेर त्यहाँका भुंइ तहका समस्याहरु बुझ्ने कोशीश गर्न थाले ।
जुन गाँउमा उनि पुग्थे त्यहाँका भुंइतहका नागरिकसंग संवाद गरेर त्यहाँका समस्याहरु डायरीमा टिपोट गर्थो । जति जति उनि गाँउ डुलेर नागरिकका दुख पीडासंग बुझ्दै गए, बेथितिहरुसंग जानकारी हुदैं गए त्यति त्यति राजनीतिप्रति उनको लगाव बढ्दै गयो र अन्नत उनले पर्सा–३ मै सांसदको चुनाव लड्ने निर्णयपनि लिए ।
चुनाव लड्ने निर्णयमा त पुगे तर दल कुन रोज्ने भन्नेमा उनि अन्योलमै थिए । जेनजी आन्दोलनपछि फागुन २१ को निर्वाचनको मिति घोषणा भएपछि पर्सा–३ का जनतामाझ भिजेको देखेर रुपेशलाई विभिन्न दलबाट प्रस्ताव आउन थाल्यो । तर उनले हतार गरेनन् ।
माघ ६ को मनोनयन दर्ता अघिसम्म उनि उम्मेदवार बन्ने निश्चितप्राय थियो तर कुन दलको भन्ने चाहि अझै टुंगीसकेको थिएन । माघ ४ मा मात्रै रुपेशले एमालेलाई रोज्ने निर्णय गरे र गुण्डु निवासमा पुगेर केपी ओलीबाट पर्सा–३ को टिकट लिए ।
माघ ६ को मनोनय सकाए लगत्तै पर्सा–३ को चुनावी प्रचारमा होमिएका रुपेशको दैनिकी क्षेत्रका मतदाताको घरदैलोमा व्यस्त छ ।दिनहुँ चुनाव लक्षित पार्टीका कार्यक्रममापनि सहभागी भइरहेका छन् । क्षेत्रका अगुवा कार्यकर्तासंग निरन्तर भेटिरहेका छन् ।
मतदातासंगको भेटमा उनिहरुबाट आइरहेको प्रतिकृयाले आँफु उत्साहित भएको रुपेश बताउँछन् । उनि भन्छन्,‘हिजो कस्ले जितेर के गर्यो के गरेन ? त्यसकोपछि म लाग्दिन । न त जनतासामु मैले भाषण गरेर ठूला ठूला आश्वासन नै दिन्छु । भुंंइमान्छेका भुंइतहका समस्या नै मेरो प्राथमिकतामा रहने गरेको छ । म जितेर गएपछि तीनै समस्यहरु मेरो प्राथमिकतामा रहनेछन् ।’
उनि थप्छन् ः यो क्षेत्र र यहाँका जनता वर्षौदेखि ठगिएका छन् । अनेक नारा,आश्वासन र वाचा गरेर यहाँका जनतालाई झुक्याउने मात्र काम हुदैं आएको छ । अब फेरि उनिहरुलाई कसैले त्यस्तै आश्वासन र वाचामा भुलाएर ठग्ने काम गर्यो भने त्यो महापाप हुनेछ । यहि कुरा मनमा राखेर म जनताको बीचमा गइरहेको छु । र जनताबाट पाइरहेको आशीर्वादले मेरो मनोबल बढ्दै गएको छ । उर्जा थपिदै गएको छ । बाँकी कुरा त मेरो इमान्दारिता र मेहनतको मुल्यांकन फागुन २१ मा जनता जनार्दनले अवश्य गर्नु नै हुनेछ ।’