वीरगन्ज,२५मंसिरः आगामी फागुन २१ गते हुने भनिएको प्रतिनिधि सभा सदस्य निर्वाचनका लागि अशोक राई नेतृत्वको जनता समाजवादी पार्टी (जसपा) ले पर्सा जिल्लाको चार वटै निर्वाचन क्षेत्रबाट उम्मेदवारहरुको नाम सिफारिस गरेको छ ।
बिहीबार वीरगन्जमा बसेको जिल्ला कार्य समितिको बैठकले पर्सा क्षेत्र नम्बर १ बाट प्रत्यक्षतर्फको उम्मेदवारमा पूर्वमन्त्री तथा निवर्तमान सांसद प्रदीप यादवको एकल नाम सिफारिस गरेको छ । जसपाका उपमहासचिव समेत रहेका यादव, पर्सा क्षेत्र नम्बर १ बाट २०७४ र २०७९ मा गरी लगातार दुई पटक प्रतिनिधि सभा सदस्यमा निर्वाचित भएका थिए ।
यस्तै पर्सा क्षेत्र नम्बर १ बाट समानुपातिकतर्फको उम्मेदवारमा नेक महमद अन्सारी,उमेशलाल सहनी, ,नूर आलम अन्सारी,पवन पञ्जियार,कुमु मानन्धर र रुबैदा खातुनको नाम सिफारिस गरिएको छ ।
जसपाले पर्सा क्षेत्र नम्बर २ बाट प्रत्यक्षतर्फको उम्मेदवारमा पनि प्रेमबाबु पटेलको एकल नाम सिफारिस गरेको छ । यस्तै समानुपातिकतर्फको उम्मेदवारमा नागेन्द्र यादव,हरेन्द्र चौरसिया र बैजन्ती मालाको नाम सिफारिस गरिएको जसपाका वीरगन्ज महानगर समिति अध्यक्ष ईश्वरचन्द्र यादवले जानकारी दिए ।
यसैगरि पर्सा क्षेत्र नम्बर ३ बाट प्रत्यक्षतर्फको उम्मेदवारमा जनार्दन प्रसाद यादवको एकल नाम सिफारिस गरिएको छ । उक्त क्षेत्रबाट समानुपातिकतर्फपनि सलमा खातुनको नाम एकल सिफारिस गरिएको यादवले जानकारी दिए ।
यस्तै यसैगरि पर्सा क्षेत्र नम्बर ४ बाट प्रत्यक्षतर्फको उम्मेदवारमा तबरेज अहमदकोपनि एकल नाम सिफारिस गरिएको छ । उक्त क्षेत्रबाट समानुपातिकतर्फपनि रम्भा यादवको नाम एकल सिफारिस गरिएको यादवले जानकारी दिए ।
वीरगन्जको होटल पूजनमा जसपा पर्साका अध्यक्ष सिंहासन सा कलवारको अध्यक्षता तथा पूर्वमन्त्री प्रदीप यादवको प्रमुख आतिथ्यता र वीरगन्ज महानगरका मेयरसमेत रहेका पार्टीका केन्द्रिय सदस्य राजेशमान सिंहको विशिेष उपस्थितीमा बसेको बैठकमा केन्द्रिय सदस्य पुरुषोत्तमलाल झा, पूर्व प्रदेश सभा सदस्य जन्नत अन्सारी लगायतकाकोपनि सहभागिता थियो ।