वीरगन्ज,११ भदौंःविघ्नहर्ता भगवान् गणेशको पूजा आराधना गरी मनाइने गणेश चतुर्थी महोत्सव वीरगन्ज–१० घडिअर्वामा पनि आज (बुधबार) देखि सुरु भएको छ ।विगतका वर्ष झै यस वर्षपनि वीरगन्ज –१० घडिअर्वास्थित रामजानकी मन्दिर प्रांगणमा गणेश चतुर्थी महोत्सव आजदेखि सुरु भएको हो ।
घडीअर्वास्थित रामजानकी मन्दिर परिसरमा सजाइएको आकर्षक टेण्टपण्डालमा भगवान् गणेशको मुर्ति स्थापना गरी पूजापाठ गरेर गणेश चतुर्थी महोत्सव शुभारम्भ गरिएको हो ।गणेश भगवानको मुर्ति अगाडि १५१ किलोको लड्डुपनि राखिएको छ ।
जय गणेश झन्कार मण्डल परिवार र जय गणेश पूजा सञ्चालक समितिको संयुक्त आयोजनामा सुरु गरिएको गणेश चतुर्थी महोत्सवमा ५ दिनसम्म बेलुकी सन्ध्या आरति,महाप्रसाद वितरण ,अखण्ड ज्योति, भजनकिर्तन र धार्मिक सांस्कृतिक कार्यक्रम आयोजना गरिने महोत्सव आयोजक समितिका अध्यक्ष मदन प्रसाद कलवारले जानकारी दिए ।उनका अनुसार,धार्मिक सांस्कृतिक कार्यक्रमका लागि भारतको मुजफरपुर,मोतिहारी, चकियाका कलाकारहरुलाई बोलाइएको छ।
त्यस्तै आज साँझको विशेष पूजा र आरतीमा वीरगन्ज महानगरपालिकाका मेयर राजेशमान सिंहकोपनि विशेष उपस्थिती रहने समतिका कोषाध्यक्ष प्रकाश सिंहले बताए ।
पहिलो दिन आज बेलुकी भारतका विधायकसमेत रहेका चर्चित लोकगायक विनय बिहारीले सांस्कृतिक प्रस्तुती दिने कार्यक्रम रहेको समतिका कोषाध्यक्ष सिंहले जानकारी दिए ।दोस्रो दिन बिहीबार बेलुकीको सांस्कृतिक कार्यक्रममा मोतिहारीका कुन्दन शर्मा र चकियाकी सुमन शर्मा , शुक्रबार बेलुकी मुजफरपुरका पप्पु बिहारी र नीतु कश्यप तथा मुजफरपुरका जीतु तिवारी र पुष्पा राज लगायतका लोकगायक र कलाकारहरुको प्रस्तूती रहने समितिका सचिव सन्तोष साह कानुले जानकारी दिए ।
विगतका वर्ष झै यस वर्षपनि वीरगन्ज –१० घडिअर्वास्थित रामजानकी मन्दिर प्रांगणमा गणेश चतुर्थी महोत्सव भव्य रुपमा आयोजना गरिएको वीरगन्ज–१० का वडाध्यक्ष सुशील साह कानुले बताए ।
सत्ययुगमा भाद्र शुक्ल चतुर्थीका दिन भगवान् गणेशको जन्म भएको शास्त्रीय मान्यता छ । यस अवसरमा देशभरका गणेश मन्दिरमा विशेष पूजा गरी गणेशको जन्मोत्सव मनाउने गरिन्छ ।शिव पार्वतीका पुत्र गणेशलाई जुनसुकै धार्मिक कर्ममा अग्र पूजाको अधिकार प्राप्त छ ।हरितालिका (तीज) को व्रत पारायण गरी गणेशको व्रत गर्ने शास्त्रीय मान्यता रहेको छ ।
भाद्र शुक्ल तृतीयाका दिन सुखद दाम्पत्य जीवन तथा सुखशान्तिको कामना गरेका ब्रतालुले चतुर्थीका दिन जीवनमा विघ्न नआओस् भनी कामना गर्न गणेश पूजा गर्ने विधान गणेश पुराणमा उल्लेख छ ।