वीरगन्ज,१६साउनःवीरगन्ज महानगरपालिकाले थालेको “एक घर, एक बिरुवा” अभियान अन्तर्गत फलफुलका विरुवा वितरण गर्न सुरु गरेकोे छ ।
महानगरपालिकाको कृषि शाखाले ७५ प्रतिशत अनुदनमा अर्थात बजारमा पर्ने मूल्यको एक तिहाई मूल्यमा फलफुलको विरुवा वितरण गर्न थालेको हो । आँप,लिच्ची,कागती,अनार,अम्बा र बेल प्रजातिका विरुवा शुक्रबारदेखि वितरण गर्न थालिएको कृषि शाखाकी प्रमुख रोशनीले यादवले जानकारी दिइन् ।
वातावरणीय सन्तुलन कायम राख्न र हरियाली प्रवद्र्धन गर्न योगदान पुगोस् भन्ने उद्देश्यले “एक घर, एक बिरुवा” अभियानलाई समेत जोड दिदैं फलफुलको विरुवा वितरण गर्न थालिएको उनले बताइन् । यसपालि महानगरपालिकाको कृषि शाखाले पाँच वटै फलफुलका करिब ४ हजार ५०० वटा विरुवा वितरण गर्ने लक्ष्य राखेको उनले जानकारी दिइन् । घरका कौशी र गमलामा समेत रोप्न सकिने खालका विरुवाहरुपनि रहेको उनले बताइन्।
७५ प्रतिशत अनुदनमा वितरण भइरहेको विरुवाको मूल्य प्रजाति अनुसार प्रतिगोटा १८ देखि ४२ रुपैयाँ तोकिएको उनले बताइन् ।
विरुवा लिनका लागि इच्छुक नगरवासीले नेपाली नागरिकताको प्रमाणपत्रको प्रतिलिपी अनिवार्य रुपमा लिएर आउनुपर्ने उनले बताइन् ।
उनले भनिन्,‘१/२ वटा मात्रै विरुवा लिनका लागि नागरिकताको फोटोकपी लिएर आउनुपर्छ । १०/१२ वटा अर्थात धेरै विरुवा लिनुछ भने जग्गाको लालपूर्जाको फोटो लिएर कृषि शाखामा सम्पर्क गर्नुपर्छ।’