वीरगन्ज,१२असारःपर्साको वीरगन्जबाट प्रहरीले ठूलो परिमाणमा लागू औषध चरेससहित एक जनालाई पक्राउ गरेको छ ।प्रहरीले ३ सय १९ केजी चरेससहित मकवानपुरको थाहानगरपालिका वडा नम्बर १२ घर भएका ३६ वर्षीय बुद्धिबहादुर स्याङ्तानलाई पक्राउ गरेको हो ।
पर्सा जिल्लामा सम्भ्वत एकपटकमा यतिधेरै परिमाणमा चरेस बरामद गरिएको पहिलो पटक भएको जिल्ला प्रहरी कार्यालय पर्साले जनाएको छ । चरेसहित पक्राउ परेका स्याङ्तानको साथबाट १ लाख ९२ हजार रुपैयाँ रकमपनि प्रहरीले बरामद गरेको छ ।
बुधबार बेलुकी बाराको परवानीपुरबाट वीरगन्जको सिर्सिया सुख्खा बन्दरगाह (ड्राइपोर्ट) तर्फ जाँदै गरेको प्रदेश २–०३–००१ ख ६३४८ नम्बरको ट्रकलाई प्रहरीले परवानीपुर चोकमा रोकेर चेकजाँच गरेको थियो । त्यसक्रममा उक्त ट्रकको सामान लोड गर्ने भागमा प्लाष्टिकको बोराभित्र पोका बनाएर राखिएको अवस्थामा ३ सय १९ केजी चरेस बरामद भएको जिल्ला प्रहरी कार्यालय पर्साका प्रमुख तथा प्रहरी उपरीक्षक गौतम मिश्रले बताए ।
ट्रकबाट चरेस बरामद भएपछि त्यसका चालक स्याङ्तानलाई पनि नियन्त्रणमा लिइएको उनले जानकारी दिए । खानतलासीका क्रममा चालक स्याङ्तानले लगाएको पाइन्टको खल्तीबाट नगद १ लाख ९२ हजार रुपैयाँ रकमपनि बरामद गरिएको मिश्रले बताए । बरामद चरेसको बजार मूल्य करिब १ करोड रुपैयाँ रहेको अनुमान गरिएको उनले बताए ।
पक्राउ परेका ट्रक चालकले उक्त चरेस आँफुले धादिङबाट ट्रकमा लोड गरेर ल्याएको र वीरगन्जको ड्राइपोर्ट नाका हुदैं भारतमा पुर्याउने योजनामा रहेको प्रहरीलाई बयान दिएको प्रहरी उपरीक्षक मिश्रले जानकारी दिए ।
चरेससहित पक्राउ परेका स्याङे्तानलाई प्रहरी हिरासतमा राखेर उनिविरुद्ध पर्सा जिल्ला अदालतबाट पाँच दिनको म्याद थपको अनुमति लिई थप अनुसन्धान भइरहेको मिश्रले बताए ।
बिहीबार जिल्ला प्रहरी कार्यालय पर्सामा आयोजित पत्रकार सम्मेलनमा प्रहरी उपरीक्षक मिश्रले चरेसको तस्करीमा संलग्न अन्य व्याक्तिहरुको बारेमापनि प्रहरीले सुक्ष्म ढंगले अनुसन्धान गरिरहेको बताए ।
चरेस,गाँजा,अफिम लगायतका लागू औषध तस्करीको सञ्जाल तोड्ने गरी पर्सा प्रहरी अहिले लागिरहेको र त्यसैको नतिजा स्वरुप यति धेरै मात्रामा चरेस बरामद गर्न सफल भएको प्रहरी उपरीक्षक मिश्रले बताए । उनले भने,‘ लागू औषध तस्करीको चेन ब्रेक गर्ने गरी पर्सा प्रहरी लागि रहेको छ । त्यसका कारण अहिले बरामद चरेसको तस्करीको नेक्सेस् बारेपनि हामीले अनुसन्धान गरिरहेका छौं ।’