वीरगन्ज,७जेठःवीरगन्ज महानगरपालिकाको नेतृत्वमा मेयरका रुपमा राजेशमान सिंह आएपछि महानगरपालिकाले वीरगन्ज शहरलाई ‘हरित शहर’ बनाउने अभियानपनि चलाएको छ ।
महानगरको मेयरमा सिंह निर्वाचित भएको तीन वर्ष पुरा भइसकेको छ । यो तीन वर्षे कार्यृकालमा वीरगन्जको सरसफाई तथा ऐतिहासिक, धार्मिक सम्पदाहरुको संरक्षण र सौन्दर्यकरणलाई मुख्य प्राथमिकतामा राखेर काम गरिरहेका मेयर सिंहले वीरगन्ज शहरलाई ‘हरित शहर’ बनाउने अभियानपनि चलाएका छन् ।
शहरका विभिन्न स्थानका सडकको डिभाइडर र सडकको दायाँबायाँ तथा अतिक्रमण मुक्त पारिएका सार्वजनिक तथा ऐलानी पर्ति जग्गामा निरन्तरत वृक्षारोपणका कार्यक्रमहरु भइरहेका छन् ।
महानगरका विभिन्न स्थानका सडकका डिभाइडर,सडकका दायाँबाया तथा खाली सार्वजनिक जग्गामा गरी हालसम्म १५ हजार बढी बिरुवा रोपिएको महानगरको वन,वातावरण तथा विपद व्यवस्थापन महाशाखाका प्रमुख ईन्जिनियर राकेश साहले बताए ।
उनले भने,‘हालसम्म २० किलोमिटर बढी सडकका डिभाइडर र दायाँबायाँमा हामीले अर्नामेन्टल प्लान्ट (फुल,सजावटका बोट) रोपेका छौं । अतिक्रणम मुक्त बनाइएका खाली जग्गाहरुमा भने काठ उत्पादन हुने रुखका बिरुवाहरु रापेका छौं ।’
यस्तै हरिखेतान बहुमुखी क्याम्पस अगाडिको शंखधर शाख्वा पार्क, वीरगन्ज–२१ के ईको पार्क र वीरगन्ज–१५ लक्ष्मणवास्थित ज्येष्ठ नागरिक र्पाकमापनि अर्नामेन्टल प्लान्ट (फुल,सजावटका बोट) रोपेको उनले बताए । वीरगन्जलाई हरित शहर बनाउने अभियान अहिलेपनि जारी रहेको साहले सुनाए ।
महानगरका मेयर सिंहले वीरगन्जलाई ‘हरित शहर’ बनाउने अभियानपनि आफ्नो मुख्य प्राथमिकतामा रहेको बताए । उनले भने,‘ शहर सफा मात्रै भएर पुग्दैन । अझ यसलाई स्वच्छ र सुन्दर बनाउन हरियालीपनि चाहिन्छ । त्यहि भएर महानगर आँफैले र अन्य विभिन्न संघसंस्थासंग सहकार्य गरेर शहरका ठाँउ ठाँउमा वृक्षारोपण गर्दै आइरहेको छ ।’
अहिलेको जलवायु परिवर्तनका कारण वातावरणमा परेको असर न्युनिकरणका लागि वृक्षारोपण मात्र एक विकल्प रहेको भन्दै उनले भने,‘ एक घर एक विरुवाको अवधारण शतप्रतिशत कार्यान्वयन हुनसक्यो भने वीरगन्जको मुहार अझ फेरिन्छ । त्यसमा म लागि रहेको छु।’