राजविराज,१९फागुनः सप्तरीको राजविराज नगरपालिका वडा नम्बर ९ मलेठस्थित एक स्याउ गोदाममा ठूलो परिमाणमा लागू औषध गाँजा फेला परेको छ ।
गोदाम नजिकैको सडकबाट गइरहेका सप्तरीका प्रमुख जिल्ला अधिकारी भोला दाहालले सडक छेउको गोदाममा एक ट्रकबाट अर्को ट्रकमा शंकास्पद सामग्री अनलोड गरिरहेको देखेपछि शंका लागि सोधीखोजी गरे ।
प्रजिअ दाहालले गोदाम सञ्चालकलाई बोलाएपछि उनी आएनन् । त्यसपछि गोदाम फोडेर हेर्दा भित्र गाँजा फेला परेको हो । जहाँ एक सयभन्दा बढी बोरामा रहेको २४ क्वीन्टल १९ केजी गाँजा बरामद भएको हो । गोदामबाट १४२ कार्टुन स्याउ र हार्डवेयरका सामानपनि बरामद भएको प्रजिअ दाहालले बताए ।
गोदाम भित्र सिट नभएको बीआर शून्य जेबी ९७३५ नम्बरको सेतो स्कारपियो र डब्लु बी ७४ एम १५५८ नम्बरको मारुती कार खाली अवस्थामा फेला परेको छ ।गोदाम घरको स्वामित्वबारे स्पष्ट जानकारी नभए पनि प्रहरीले सम्बन्धित व्यक्तिहरूको खोजी तथा थप अनुसन्धान कार्य जारी राखेको जनाएको छ।