वीरगन्ज,१५माघ:तलब नपाएको भन्दै आन्दोलित शिक्षकहरूले विद्यालयको चाबी प्रमुख जिल्ला अधिकारीलाई बुझाएपछि १० दिनदेखि पर्साको बहुदरमाई नगरपालिकाका सबै सामुदायिक विद्यालयमा पढाइ ठप्प भएको छ ।
सात महिनादेखि तलब नपाएकाले जीविकोपार्जनमै कठिनाइ भएको भन्दै गत माघ ६ देखि बहुदरमाई नगरपालिका मातहातका २० वटा सामुदायिक विद्यालयका शिक्षकले विद्यालय बन्द गरी चाबी प्रजिअ गणेश अर्याललाई बुझाएका हुन् ।
विद्यालय बन्द गरेको १० ओैं दिन बित्दा पनि समस्या समाधान भएको छैन । शिक्षकले नियमित तलब नपाउँदा विद्यालयको शैक्षिक गतिविधि बिग्रिएको भन्दै विद्यार्थीसहितकाे समूहले गत पुस ५ मा बहुदरमाई नगरपालिकाको कार्यालयमा तोडफोड, तथा आगजनी गरेका थिए । तोडफोड तथा आगजनीमा करिब एक करोड रुपैयाँ बराबरको क्षति भएको प्रहरीले जनाएको थियो ।
चालु आर्थिक वर्षको साउनदेखि हालसम्म शिक्षक, कर्मचारी र स्वास्थ्यकर्मीले तलब पाएका छैनन् । नगरसभामा नीति, कार्यक्रम तथा बजेट प्रस्तुत भए पनि मेयर सिंघासन साह तेलीले त्यसलाई प्रमाणीकरण नगर्दा बजेट निकासा भएको छैन । गत कात्तिक ८ मा बहुदरमाई नगरपालिकाको बजेट प्रस्तुत भएको थियो ।
नेपाल शिक्षक महासंघ पर्साका अध्यक्ष तीर्थराज यादवका अनुसार पटक–पटक माग गर्दा पनि सुनुवाइ नभएपछि बाध्य भएर विद्यालयको साँचो बुझाउनु परेको थियो । ‘विद्यालय बन्द भएको नवौं दिन बित्दा पनि समस्या समाधानतर्फ सरोकारवाला पक्ष अग्रसर भएका छैनन्,’ उनले भने, ‘स्थिति झन् विकराल बन्दै गएको छ ।’
चालु आर्थिक वर्षको सातौं महिना पुग्दा पनि बहुदरमाई नगरपालिकाको बजेट प्रमाणीकरण भएको छैन ।मेयर साहले बजेट खर्चको अख्तियारी प्रमुख प्रशासकीय अधिकृतलाई नदिँदा बजेट निकासा हुन नसकेको हो ।
स्थानीय सरकार सञ्चालन ऐनबमोजिम असार १० सम्म आगामी आर्थिक वर्षको राजस्व र व्ययको अनुमान नगरसभामा पेस गर्नुपर्ने व्यवस्था छ । तर, बहुदरमाईको २०८१/८२ को बजेट निर्धारित समयभन्दा झन्डै चार महिनापछि गत कात्तिक ८ गते ११ औँ नगरसभामा प्रस्तुत भएको थियो । तर, नगरसभा सम्पन्न भएको करिब तीन महिना बित्दा पनि मेयर साहले बजेट खर्चको अख्तियारी दिएका छैनन् ।भूषण यादव/कान्तिपुर