वीरगन्ज,२मंसिरःबाराको महागढीमाई नगरपालिकाको बरियारपुरमामा रहेको गढीमाई मन्दिरमा राखिएको दान पेटिका थप साढे ७ लाख रुपैयाँ भन्दा बढी भेटी संकलन भएको छ ।
दोश्रो पटक शनिबार खोलिएको चार वटा दान पेटीकाबाट ५ लाख २४ हजार १६५ रुपैयाँ र नगदी रसिदबाट २ लाख १४ हजार ५७२ रुपैयाँ गरी ७ लाख ४२ हजार ७३६ रुपैयाँ भेटी संकलन भएको गढीमाई मेला सञ्चालन तथा व्यवस्थापन समितिका अध्यक्ष उपेन्द्र यादवले जानकारी दिए ।यस्तै दान पेटिकाबाट सुनका गहना ५ थान र चाँदीको गहना ४ थानसमेत संकलन भएको उनले बताए ।
गढीमाई मन्दिर प्रांगणमा राखिएका चार वटा दान पेटीकाबाट कात्तिक १४ देखि कार्तिक ३० गतेसम्म १७ दिनको अवधिमा उक्त भेटी संकलन भएको उनले बताए ।
यसअघि दसैंको घटस्थापना अर्थात असोज १७ देखि कार्तिक १३ गतेसम्म मन्दिर प्रांगणमा रखिएका चार वटा दान पेटिकाबाट ७ लाख ३५ हजार ३४१ रुपैयाँ गनद तथा नगदी रसिदबाट २ लाख ३१ हजार ७२ रुपैयाँ गरी कूल ९ लाख ६६ हजार ४१३ रुपैयाँ भेटी संकलन भएको थियो ।साथै दान पेटीकाबाट पाँच वटा सुनको तिलहरी गरी ७ थान सुनको गहना र २६ थान चाँदीका गहनापनि भेटीका रुपमा संकलन भएको थियो ।
दानपेटिकाबाट संकलन भएको रकम गढीमाई विकास समितिको कोषमा जम्मा गरिने अध्यक्ष यादवको भनाई छ ।