वीरगन्ज,१६कार्तिकःतिहार अर्थात दिपावलीका लागि यस वर्ष करिब ३० करोड रुपैयाँको झिलिमिली बत्ती भारत तथा तेश्रो मुलुकबाट नेपालमा आयात भएको छ ।
वीरगन्ज लगायतका अन्य नाका हुदैं अहिले सम्म ३० करोड रुपैयाँ हाराहारी मूल्य बराबरका झिलिमिली बत्ती आयात भएको नेपाल विद्युतीय व्यवसायी महासंघले जनाएको छ । महासंघका अध्यक्ष रेशम प्रसाद देवकोटाका अनुसार, गत वर्षको तिहारलाई लक्षित गरी करिब ४५ करोड रुपैयाँ बराबरको यस्तो बत्ती आयात भएको थियो ।
तिहारमा सबैभन्दा बढी एलईडी डिस्को लाइट, नेट झालर, एलईडी लाइट एलईडी फ्रेम लाइट दियो र स्ट्रप लाइटजस्ता बत्तीहरू बढी खरिदबिक्री हुने गर्छ ।
२०७९ सालको तिहारमा पनि ४० करोड रुपैयाँ बराबरको झिलिमिली बत्ती आयात भएको थियो । २०७८ सालमा भने कोरोनाको समय भएका कारण झिलिमिली बत्ती आयात केही घटेको थियो ।कोरोना महामारी फैलनुअघि वार्षिक ६० देखि ७० करोड रुपैयाँ बराबरको झिलिमिली बत्ती आयात हुने गरेको थियो । कोरोना फैलिएपछि २०७७ सालमा भने १८ करोड रुपैयाँको मात्रै झिलिमिली बत्ती आयात भएको थियो ।
यस पटक बजारमा मागपनि कम भएका कारण झिलिमिली बत्तीको आयात कम भएको देवकोटाले बताए । एकपटक किनेका त्यस्ता बत्ती तीन÷चार वर्षसम्म चल्ने गरेकाले आयात कम भएको उनले बताए ।
नेपालमा आयात हुने झिलिमिली बत्तीको धेरै हिस्सा उत्तरी छिमेकी मुलुक चीनबाट ल्याउने गरिएको छ । झिलिमिली बत्ती सबैभन्दा धेरै चीनबाट नै आयात हुन्छ ।त्यसपछि भारतबाटपनि आयात हुन्छ ।