वीरगन्ज,२९ असोजःवीरगन्ज–रक्सौल नाकास्थित नेपाल तर्फको भूभागमा मंगलबार दिउँसो भारतीय सीमा सुरक्षा बल (एसएसबी) ले गोली चलाएको खबर प्राप्त भएको छ ।नेपाल–भारत सिमामा अवस्थित मितेरी पुलको तल तिरको नेपाली भूभागमै प्रवेश गरेर एसएसबीले गोली चलाएको प्रत्यक्षदर्शी एक महिलाले बताइन् ।
कबाड संकलन गर्ने दुई महिला र दुई पुरुषलाई भारतीय भूमीमा पर्ने अहरिवा टोलाबाट खेद्दै आएका एसएसबीका एक जवानले गोली चलाएको ती महिलाले बताइन् । एसएसबीले चलाएको गोली भने कसैलाई नलागेको ती प्रत्यक्षदर्शी महिलालले जानकारी दिइन् । एसएसबीले गोली चलाएपछि भने उनिहरु नेपाल तर्फ भागेको बताइएको छ ।एसएसबीले गोली चलाउनुको कारण भने खुल्न सकेको छैन ।
जिल्ला प्रहरी कार्यालय पर्साका प्रवक्ता प्रहरी नायब उपरीक्षक दीपक भारतीले भने घटनास्थलमा एउटा गोलीको खोका भेटिएको बताए ।नेपाल–भारत सीमास्थित मितेरी पुलको छेउमा रहेको नेपाली भू-भागमा इन्सास राइफलमा लाग्ने एउटा गोलीको खोका भेटिएको उनले बताए ।
प्रहरी नायब उपरीक्षक भारतीले भने,‘गोलीको खोका भेटिएको छ । तर गोली नै चलेको भन्ने पुष्टि भइसकेको छैन । घटटनास्थलमा प्रहरीको टोली पुगेर अनुसन्धान गगरिरहेको छ ।’
यसबारेमा जानकारी लिन पर्साका प्रमुख जिल्ला अधिकारी दिनेश सागर भुसाललाई टेलिफोनमा सम्पर्क गर्दा उनलले मितेरी पुल क्षेत्रमा गोली चलेको खबर मात्रै आँफुले पाएको तर यसको आधिकारीक पुष्टि हुन बाँकी रहेको बताए ।गोली चलेको भनिएको स्थाानमा नेपाल प्रहरी र सशस्त्र प्रहरीका प्रहरी उपरीक्षकहरुलाई आँफुले पठाइसकेको भन्दै प्रमुख जिल्ला अधिकारी भुसालले भने,‘ दुवै एसपीसाबलाई मैले त्यहाँ पठाइसकेको छु । तर उहाँहरुबाट यसबारेमा अहिलेसम्म कुनै रिपोर्टिङ भइसकेको छैन ।’