काठमाडौं,२१भदौंः लोकतान्त्रिक समाजवादी पार्टी (लोसपा) नेपालले संविधान संशोधनका बारेमा अन्य दलहरुसंग छलफल गर्न तीन सदस्यीय कार्यदल गठन गरेको छ ।
काठमाडौंमा बुधबार र बिहीबार गरी दुईदिन बसेको लोसपाको केन्द्रीय पदाधिकारी बैठकले लक्ष्मणलाल कर्ण संयोजक तथा दानबहादुर विश्वकर्मा र परमेश्वर साह सदस्य रहने गरी तीन सदस्यीय कार्यदल गठन गरेको हो ।
संविधान संशोधनको लागि विगतमा उठाइएका मधेसका सबै मुद्दाहरुको संकलन गर्दै मधेशी, थारू र अन्य उत्पीडीत जनताको अधिकार कायम गराउन सरोकारवाला सबै दलसँग सहकार्यको लागि’ कार्यदल बनाउने निर्णय गरिएको लोसपाले जनाएको छ । बैठकले केन्द्रीय समितिलाई महाधिवेशन तयारी मूल समितिमा परिणत गर्ने निर्णय पनि गरेको छ । साधारण सदस्यताको लागि सदस्यता अभियान कार्तिक मसान्तसम्म चलाउने निर्णयपनि गरिएको लोसपाका वरिष्ठ उपाध्यक्ष जितेन्द्र सोनलले जानकारीदिए । उनका अनुसार बैठकले २०८२ बैशाख २६ गते महाधिवेशन गर्ने निर्णयपनि गरेको छ ।
मधेस प्रदेश लगायत अन्य जिल्लामा बालिनाली सुख्खाग्रस्त भएकोले किसानलाई अल्पकालीन र दिर्घकालीन व्यवस्थापन गर्नुपर्ने माग गर्दै लोसपाले उखुँ किसानले सरकारबाट पाउनु पर्ने अनुदान रकम प्राप्त गर्न नसकेको प्रति सरकारको ध्यानाकर्षणपनि गराएको छ ।