वीरगन्ज,२६चैतः नेपाल प्रेस युनियन पर्साले सदस्यता विवादको टुङ्गो नलागेसम्म नेपाल पत्रकार महासंघको जिल्ला अधिवेशनको मिति नतोक्न माग गरेको छ ।
सोमबार नेपाल पत्रकार महासंघ पर्सा शाखाका अध्यक्ष अनुप तिवारीलाई प्रेस युनियन पर्साका अध्यक्ष विजय महतोले ज्ञापनपत्र बुझाउँदै महासंघको सदस्यताको विवाद टुंग्याएरमात्र महासंघको जिल्ला अधिवेशनको मिति तोक्न माग गरेका हुन् ।
प्रेस युनियन पर्साले बुझाएको ज्ञापनपत्रमा भनिएको छ–‘पर्साबाट पत्रकार महासंघले सदस्यता शुद्धिकरण र नयाँ सदस्यताका लागि गरेको सिफारिस प्रति प्रेस युनियन लगायतका अन्य संघसंगठनले यसअघि नै विरोध जनाइसकेकोले सदस्यता सिफरिस नै विवादीत रहेको छ । तसर्थ सदस्यता सम्बन्धि उक्त विवाद टुंग्याएर सबै संघसंगठनको सहमतिमा मात्र जिल्ला अधिवेशनको मिति तोक्न प्रेस युनियन पर्साले माग गर्दछ ।’
प्रेस युनियनको यो माग र आग्रहलाई यदि अटेर गरेर पत्रकार महासंघ पर्साले जिल्ला अधिवेशनको मिति तोकेमा त्यसविरुद्ध प्रेस युनियन चरणबद्ध आन्दोलनमा उत्रिने चेतावनी समेत प्रेस युनियन पर्साले दिएको छ ।
प्रेस युनियनका अध्यक्ष महतोका अनुसार, यहि माग राखेर प्रेस युनियन पर्सा शाखाले पत्रकार महासंघ मधेस प्रदेश समिति र केन्द्रिय कार्य समितिलाईपनि ज्ञापनपत्र बुझाइएको छ । ज्ञापनत्र बुझाउन गएको टोलीमा प्रेस युनियन पर्साका उपाध्यक्ष क्रान्ति शाह, सचिव इरफान अली,कोषाध्यक्ष कपिलदेव यादव, प्रदेश सदस्य उदय दास ,जिल्ला सदस्य सन्जय गुप्ता, राकेश चौरसिया लगायतको सहभागीता थियो ।
यसैबिच पत्रकार महासंघको मधेस प्रदेशका पर्सा, बारासहित ६ जिल्ला शाखाले भने नेपाल पत्रकार महासंघ केन्द्रीय कार्यसमितिले सदस्यताको नामावली प्रकाशन नगरेसम्म जिल्ला अधिवेशन नगर्ने सामुहिक निणर्य गरेका छन् ।
पत्रकार महासंघ पर्सा, बारा ,सर्लाही,रौतहट,सप्तरी र सिरहा शाखाका अध्यक्षहरुले एक विज्ञप्ति जारी गर्दै जिल्ला शाखाले गरेको विधान अनुसार निणर्य बमोजिम शुद्धिकरण र नवीकरण तथा नयाँ सदस्यताको नामावली प्रकाशन नगरेसम्म जिल्ला अधिवेशन नगर्ने निर्णय गरेका हुन् ।
संयुक्त विज्ञप्तिमा पत्रकार महासंघ पर्सा शाखाका अध्यक्ष अनुप तिवारी , बारा अध्यक्ष रेशम तिवारी , सर्लाही अध्यक्ष टंक क्षेत्री , रौतहट अध्यक्ष प्रेमचन्द्र झा , सप्तरी अध्यक्ष श्रावण देव र सिरहा अध्यक्ष मनोज कुमार बनैताको हस्ताक्षर रहेको छ ।