काठमाडौं,१८पुषः पूर्वराजा ज्ञानेन्द्र शाह र राप्रपाका शीर्ष नेताहरुबीच भैरहवामा भेटवार्ता भएको छ ।पूर्व राजा ज्ञानेन्द्रले भेट्न चाहेको सन्देश पठाएपछि राप्रपा नेताहरु मंगलबार भैरहवा पुगेका थिए ।
बुधबार भैरहवामा पूर्वराजा ज्ञानेन्द्रसंग भएको भेटमा राप्रपा अध्यक्ष राजेन्द्र लिङ्देनसँगै वरिष्ठ उपाध्यक्ष रवीन्द्र मिश्र, उपाध्यक्ष बुद्धिमान तामाङ, महामन्त्री धवलशम्शेर राणा र सांसद दिपक सिंह सहभागी थिए ।
‘देशको परिस्थिति र समसामयिक विषयमा उहाँसँग हामीले भलाकुसारी गरेका हौं,’ राप्रपा महामन्त्री धवलशमशेर राणाले भने, ‘होटलमा करिब डेढ घन्टा उहाँसँग कुराकानी गरेका थियौं।’
‘देशको परिस्थिति के छ भनेर उहाँले सोध्नुभएको थियो। हामीले पनि उहाँको भ्रमणका विषयमा बुझ्यौं,’ उनले भने, ‘जनताको माग, परिस्थितिजस्ता कुरा पनि भए।’राजसंस्था, हिन्दुराष्ट्र पुनर्स्थापना र संघीयता खारेजीका लागि घोषणा गरेको आन्दोलनबारे पनि पूर्वराजालाई जानकारी गराइएको उनको भनाइ छ।
‘सबै राजावादी र राष्ट्रवादीलाई एक ठाउँमा ल्याएर हामी अघि बढ्छौं भन्ने कुरा उहाँलाई जानकारी गराइएको छ,’ महामन्त्री राणाले भने।