मधेसखबर
पुष ६ गते : हाल १९ वर्ष भन्दा माथिका र पढेलेखेका मानिसहरु नै विभिन्न प्रलोभनमा परेर बेचविखनमा पर्ने र ठगिने क्रम बढेको छ ।
विहीबार फाउण्डेसन हेरेस्को सहयोगमा माईती नेपालले आयोजना गरेको पत्रकार सम्मेलनमा माईती नेपाल वीरगंजले यो एक वर्षको अवधीमा २ सय ६० जनाको उद्धार गरेको जनाएको छ । २०२३ को जनवरीदेखी २०२३ डिसेम्बर महिनाको हालसम्ममा ३ जना बालक ,२ सय ५७ जना महिला गरी कुल २ सय ६० जनाको माईती नेपालले उद्धार गरेको हो । तर गत वर्ष यही अवधीमा ५७ जनालाई भने सिमानाकाबाट उद्धार गरीएको थियो भने सोही अवधीमा यस वर्ष १७ जनालाई उद्धार गरीएको छ ।
उद्धार गरीएकाहरु मध्ये अधिकांश १८ वर्ष भन्दा माथिका रहेका र उनीहरु मध्ये ७१ जनालाई भने नेटवर्किंग कम्पनीमा तालिमपछि जागिर लगाईदिने प्रलोभनमा परेर भारत जान लागेकाहरुलाई उद्धार गरी सम्झाईबुझाई गरी घर फर्काइएको माईती नेपालका सुपरभाईजर गोमा पौडेलले जानकारी दिईन् ।
वीरगंजमा मात्रै माईती नेपाल , आशिष सामाजिक नेपाल ,आफन्त नेपाल,साना हात नेपाल र नेपाल प्रहरी लगायतले सिमा नाकामा चेकजाँचका साथै विभिन्न तवरबाट बेचविखन विरुद्ध निगरानी राखिरहेका छन् ।माईती नेपालको संरक्षणमा पुगेका खासगरी बालिका र महिलाहरु मध्ये ३८ जना मधेश प्रदेशका, ५८ जना बागमती, ३३ जना कोशी प्रदेशका,लुम्बिनी प्रदेशका १३ जना, गण्डकीका ३८ जना र सुदुरपश्चिमका ७ जना रहेका छन् । जसमध्ये १ देखी ५ वर्ष उमेर समुहका २३ जना, ६ वर्षदेखी ८ वर्ष उमेर समुहका ४६ जना, ९ देखी १२ उमेर समुहका १ सय १ जना,१२ देखी माथिका उमेर समुहका ६ जना रहेका छन् भने अशिक्षित १० जना रहेका छन् ।
त्यस्तै ती मध्ये ८९ जना जनजाती , ४५ जना ब्राह्मण क्षेत्री समुदायबाट छन् भने दलित समुदायबाट २६ जना रहेका छन् । त्यस्तै १९ जना मधेशी र ८ जना मुश्लिम समुदायबाट रहेका छन् । उद्धार गरीएका अधिकांश पर्सा,सर्लाही , झापा , धनुषा लगायतका जिल्लाबाट रहेको माईती नेपालका सुपरभाईजर विरेन्द्र गौतमले जानकारी दिए।
वीरगंजको मुख्य नाकामा निगरानी बढाईएको भएपनि पर्सा जिल्लाको भिश्वा , भंगाहा,बाराको बलिरामपुर लगायत मधेश प्रदेशका अन्य जिल्लाका खासगरी ग्रामीण नाकाबाट विभिन्न अपराधिक गतीविधी लगायत बेचविखनमा पर्ने घटनामा वृद्धि भईरहेको पाईएको माईती नेपालका सुपरभाईजर विरेन्द्र गौतमले बताए ।
हाल उद्धार गरीएका युवती र महिलाहरु मध्ये धेरै जसो हाल देशमा बढ्दो बेरोजगारी समस्याका कारण टवर्किंग कम्पनीको आर्थिक प्रलोभनमा परेर जानेहरु देखीएका छन् । वी विनर, ओरियन्ज, रिविजन,विशालमार्ट,डाँफे लगायतका नामबाट नेटवर्किंग कम्पनी खोलेर नेपालका मानिसहरुलाई ठगिरहेको पाईएको माईती नेपालले जनाएको छ ।