ललितपुर,३१भदौं : म्याद गुज्रेका सामग्री बिक्री गरेको भन्दै संयुक्त बजार अनुगमन ललितपुरको टोलीले पुल्चोकमा रहेको भाटभटेनी सुपरमार्केटलाई एक लाख रुपैयाँ जरिबाना गरेको छ ।
ललितपुरका सहायक प्रमुख जिल्ला अधिकारी अमरदीप सुनुवारसहितको टोलीले आइतबार कृष्णगल्लीमा रहेको भाटभटेनी, मानभवनको बिग मार्ट र पुल्चोकको सेलवेज डिपार्टमेन्टको अनुगमन गरेको थियो ।
अनुगमनका क्रममा भाटभटेनीले म्याद सकिएको घिउ, अण्डा बिक्री गरेको पाइएपछि न्यूनतम एक लाख रुपैयाँ जरिबाना गरिएको सहायक प्रजिअ सुनुवारले जानकारी दिए । उनका अनुसार बिग मार्टले बिक्री गर्ने हरियो तरकारीमापनि कम तौल पाइएपछि १० हजार जरिबाना गरिएको छ । यस्तै म्याद सकिएको बियर बिक्री गरेको भेटिएपछि १० हजार रुपैयाँ जरिबाना गरिएको सुनारले जानकारी दिए ।
‘संयुक्त बजार अनुगमन ललितपुरको टोलीले आइतवारदेखि चाडपर्व लक्षित बजार अनुगमन शुरु गरेको हो । हामीले शिक्षा दिने गरी बजार अनुगमन थालेका छौँ, मानिसको स्वास्थ्यसँग खेलबाड गर्ने गरी खाद्यवस्तु बिक्री÷वितरण नगर्न सचेत गराउँदा पनि पालना नगरेपछि जरिबाना गरिएको हो’, सहायक प्रजिअ सुनुवारले भने ।