वीरगन्ज ,२९भदाैं: एसिया कप क्रिकेटमा भारतलाई हराउँदै बंगलादेशले सान्त्वना जित हात पारेको छ। सुपर फोरमा लगातार दुई खेलमा पराजित भएपछि फाइनलमा पुग्न असफल भएको बंगलादेशले शुक्रबार श्रीलंकाकाे कोलम्बोमा भएकाे खेलमा भारतलाई ६ रनले हराएकाे हाे।
बंगलादेशले दिएको २६६ रनको लक्ष्य पछ्याएको भारत ४९.५ बलमा २५९ रनमै अलआउट भएपछि खेल बंगलादेशले जितेकाे हाे।
अन्तिम ओभरमा भारतलाई जितका लागि १२ रन चाहिएको थियो भने एक विकेट बाँकी थियो। जसमा बंगलादेशका तान्जिम हसन सकिबले भारतका मोहमद सामीविरुद्ध पहिलो चार बलमा चार रन मात्र खर्चिए। पाँचौ बलमा सामी रनआउट भए।
त्यसअघि ४९ ओभरमा मुस्ताफिजुर रहमानले शार्दूल ठाकुरलाई ११ रन र अक्षर पटेललाई ४२ रन आउट गर्दा ५ रन दिएर २ विकेट लिएका थिए। जसका कारण खेल बंगलादेशको पक्षमा ढल्किएको थियो।
खेलमा भारतका लागि शुभमन गिलले १२१ रन जोडे पनि हारका कारण उनकाे शतक छाँयामा पर्यो। भारतका कप्तान रोहित शर्मा शून्य तथा तिलक बर्मा र केएल राहुल ५-५ रनमा आउट भएपछि भारत सुरुमै दबाबमा परेको थियो।
बलिङ तर्फ बंगलादेशका मुस्ताफिजुरले ३ विकेट लिँदा तान्जिम र मेहदी हसनले २-२ विकेट हात पारे।
त्यसअघि पहिले ब्याटिङ गरेको बंगलादेशले ८ विकेटको क्षतिमा २६५ रन बनाएको थियाे। बंगलादेशका लागि सकिब अल हसनले ८० रन जोडे भने मेहदी हसनले ५४ रन र नसुम अहमदले ४४ रनको योगदान दिए।
बलिङमा भारतका शार्दूल ठाकुरले ३ विकेट लिँदा सामीले २ विकेट हात पारे।
यससँगै एसिया कपको सुपर फोरका खेल सकिएका छन्।एसिया कपको फाइनलमा आइतबार आयोजक श्रीलंका र भारतबीच खेल हुनेछ।