वीरगन्ज, २४ साउन: वीरगन्ज महानगरपालिकाका मेयर राजेशमान सिंहले वीरगन्जमा नयाँ व्यवसाय तथा उद्यम गर्ने युवाहरूलाई सहयोग गर्न महानगर सधैँ तयार रहेको बताएका छन् ।
बुधबारदेखि वीरगन्जमा सञ्चालनमा ल्याइएको क्याफे, लाउन्ज तथा बार रूबिक रेस्टुराँकाे उद्घाटन गर्दै मेयर सिंहले भने, ‘युवा उद्यमीहरूलाई चाहिएको प्रत्येक सहयोग महानगरबाट उपलब्ध गराउन म तयार छु । प्रस्ताव ल्याउनुस्, हामी सहकार्य गर्छौँ ।’
वीरगन्जमा प्रत्येक महिनाको अन्तिम शुक्रबार र शनिबारर लगाइने रात्रि बजारले पनि रेस्टुराँ सञ्चालकहरूलाई सहयोग पुगिरहेको दाबी गर्दै उनले भविष्यमा रात्रि बजारलाई दैनिक बनाउने आफ्नो योजना रहेको पनि सुनाए ।
मेयर सिंहले वर्तमान समयमा युवाहरू वैदेशिक रोजगार तर्फ आकर्षित भइरहेको बेला स्थानीय युवाहरूले जोखिम मोलेर नेपालमै केही गर्नुपर्ने भन्ने सोचका साथ रेस्टुराँ सञ्चालन ल्याएकोमा खुसी व्यक्त गरे ।
स्थानीय युवा व्यवसायीहरूको झन्डै अढाई करोड रुपैयाँको लागतमा सञ्चालनमा आएको रेस्टुराँको मेयर सिंह लगायतका अतिथिहरूले रिबन काटेर उद्घाटन गरेका हुन् ।