वीरगन्ज, ३ साउन : मुलुकको कूल आयात निर्यातको झण्डै ७० प्रतिशत कारोबार हुने वीरगन्ज नाकामा रहेका दुवै भन्सार कार्यालय गत आर्थिक वर्षमा राजश्व संकलनको लक्ष्य पुरा गर्न असफल भएका छन् ।
नेपालकै प्रमुख प्रवेशद्वार वीरगन्ज नाकामा रहेका वीरगन्ज भन्सार कार्यालय र सिर्सिया सुख्खा बन्दरगाह भन्सार कार्यालयले गत आर्थिक वर्ष २०७९÷८० मा लक्ष्यको ६० प्रतिशत हाराहारीमा मात्र राजश्व संकलन गरेका छन् ।
विश्वव्यापी आर्थिक मन्दीका कारण वीरगन्ज नाकामा रहेका दुवै भन्सार कार्यालयले भन्सार विभागले दिएको लक्ष्यको ६० प्रतिशत हाराहारीमा मात्रै राजश्व संकलन गर्न सकेको भन्सार कार्यालयका कर्मचारी बताउछन् ।
गत आर्थिक वर्षमा भन्सार विभागले वीरगन्ज भन्सार कार्यालयलाई २ खर्ब ६० अर्ब ९७ करोड २ लाख ८ हजार रुपैयाँ राजश्व संकलनको लक्ष्य दिएको थियो । तर वीरगन्ज भन्सारले लक्ष्यको ६०.२० प्रतिशत मात्र अर्थात १ खर्ब ५७ अर्ब ८ करोड रुपैयाँ मात्र राजश्व संकलन गरेको वीरगन्ज भन्सार कार्यालयका प्रमुख भन्सार प्रशासक डिलाराम पन्थीले बताए ।
वीरगन्ज भन्सारले अघिल्लो आर्थिक वर्ष २०७८÷७९ मा भने लक्ष्य भन्दा बढी नै राजस्व संकलन गरेको थियो । अघिल्लो आर्थिक वर्षमा वीरगन्ज भन्सारले लक्ष्य भन्दा शुन्य दशमलव ५४ प्रतिशतले बढि नै अर्थात भन्सार विभागले दिएको लक्ष्य भन्दा १ अर्ब ९ करोड ५३ लाख २२ हजार रुपैया बढि राजश्व संकलन गरेको थियो ।उक्त आर्थिक वर्षमाका लागि भन्सार विभागले २ खर्ब ३ अर्ब २ करोड ५० लाख ३७ हजार रुपैयाको लक्ष्य दिएकोमा वीरगन्ज भन्सारले २ खर्ब ४ अर्ब १२ करोड ३ लाख ५९ हजार रुपैया राजश्व संकलन गरेको थियो । त्यसअघिका लगातार पाँच वर्ष (आर्थिक वर्ष २०७२÷०७३ देखि २०७७÷७८ सम्म) मा भने वीरगन्ज भन्सार राजश्व असुलीको लक्ष्य पुरा गर्न असफल नै भएको थियो ।
त्यस्तै वीरगन्जमै रहेको सिर्सिया सुख्खा बन्दरगाह भन्सार कार्यालयले पनि गत आर्थिक वर्षमा लक्ष्यको ६२.८८ प्रतिशत मात्रै राजश्व संकलन गर्न सकेको छ ।भन्सार विभागले गत आर्थिक वर्षमा सिर्सिया सुख्खा बन्दरगाह भन्सार कार्यालयलाई ६७ अर्ब ४३ करोड ८६ लाख ९४ हजार रुपैयाँ राजश्व संकलनको लक्ष्य दिएको थियो । तर उक्त भन्सारले पनि लक्ष्यको ६२.८८ प्रतिशत मात्रै अर्थात ४२ अर्ब ४० करोड २२ लाख ९२ हजार रुपैयाँमात्र राजश्व संकलन गर्न सकेको सुख्खा बन्दरगाह भन्सार कार्यालयका प्रमुख रामप्रसाद मैनालीले बताए ।
सिर्सिया सुख्खा बन्दरगाह भन्सार कार्यालयले अघिल्लो आर्थिक वर्ष मा पनि लक्ष्य भन्दा करिब ५ प्रतिशत कम अर्थात लक्ष्यको ९४.९८ प्रतिशतमात्रै राजश्व संकलन गरेको थियो । उक्त आर्थिक वर्षमा भन्सार विभागले ५२ अर्ब ४ करोड ९९ लाख ११ हजार रुपैयाँ राजश्व संकलनको लक्ष्य दिएकोमा सुख्खा बन्दरगाह भन्सार कार्यालयले ४९ अर्ब ४३ करोड ६५ लाख ४४ हजार रुपैयाँमात्रै राजश्व संकलन गरेको थियो ।
वीरगन्ज भन्सार कार्यालयका प्रमुख भन्सार प्रशासक पन्थीले गत आर्थिक वर्षमा राजश्व संकलनको लक्ष्य पुरा गर्न नसक्नुको प्रमुख कारण विश्वव्यापी आर्थिक मन्दी भएको बताए । यसका साथै बढि राजश्व उठ्ने पेट्रोलियम पदार्थ , नयाँ सवारी साधन र औद्योगिक कच्चा पदार्थको आयातमा कमी आएका कारणलेपनि त्यसको असर राजश्व संकलनमा परेको पन्थीले बताए ।पन्थीले भने,‘ राजश्व असुलीको लक्ष्य पुरा गर्न नसक्नुको प्रमुख कारण त विश्वव्यापी आर्थिक मन्दीको असर नै हो , जसका कारण समग्र मालवस्तुको आयातमा ह्वात्तै कमी आयो, त्यससंगै बढि राजश्व उठ्ने इन्धन ,नयाँ सवारी साधन र औद्योगिक कच्चा पदार्थको आयातमा पनि कमी भयो ।’
सिर्सिया सुख्खा बन्दरगाह भन्सार कार्यालयका प्रमुख रामप्रसाद मैनालीले पनि विश्वव्यापी आर्थिक मन्दीको असर सुख्खा बन्दरगाह भन्सारको राजश्व असुलीमा पनि परेको बताए । यससगै केहि महिना विलाशीता वस्तुहरुको आयातमा प्रतिबन्ध लागेका कारणलेपनि त्यसको नकरात्मक असर राजश्व संकलनमा परेको उनले बताए । उनले भने,‘ आर्थिक मन्दीले बजार चलायनमान नहुदाँ मालवस्तूको आयातमा कमी आयो , यससंगै नेपाल सरकारले नै केहि महिना सम्म विदेशी मदिरा , नयाँ सवारीसाधन, इलेक्ट्रोनिक्स उपकरण लगायतका विलाशीताका वस्तुहरुको आयातमा प्रतिबन्ध नै लगायो , यी सबै कारणले भन्सारको राजश्व असुली प्रभावित हुन पुगेको हो ।’