मधेसखबर
वीरगन्ज,०४ कार्तिक : पर्सामा राजनीतिक दल र उम्मेदवारले आचार संहिता उल्लंघन गरि सार्वजनिक स्थानमा प्रयोगका गरेका चुनावी प्रचारका सामाग्रीहरु निर्वाचन आयोगले हटाउन थालेको छ ।
निर्वाचन आचार संहिताको उल्लंघन गर्दै दल र उम्मेदवारहरुले चुनावी प्रचार प्रसार गरिरहेको भएपनि निर्वाचन आयोग मौन बसेको जनगुनासो आएपछि जिल्ला निर्वाचन कार्यालय पर्साले त्यस्ता चुनावी प्रचारका सामाग्रीहरु शुक्रबार देखि सुरक्षाकर्मी लगाएर हटाउन थालेको हो ।
निर्वाचन कार्यालयका अचार संहिता उल्लंघन अनुगमन अधिकृत रुद्र कार्कीको नेतृत्वमा सुरक्षाकर्मी सहित खटिएको टोलीले शुक्रबार पोखरीया नगरपालिका , विन्दवासीनी र पकाहामैनपुर गाँउपालिकाका विभिन्न स्थानमा पुगेर आचार संहिता विपरित प्रयोग गरिएका चुनावी प्रचारका सामाग्री हटाउन थालेको हो ।
नेपाल प्रहरी र सशस्त्र प्रहरी सहित खटिएको टोलीले पोखरिया नगरपालिकाको पोखरिया बजार , बिन्दवासनी गाउपालिकाको अमरपट्टी ,प्रसौनिभाठा तथा पकहामैनपुर गाउपालिकाको पकाहा स्थित सडकका पोल , सरकारी कार्यालय लगायतका सार्वजनिकस्थलमा दल र उम्मेदवारहरुले राखेका झण्डा , ब्यानर, साइन बोर्ड , पोष्टर र पम्प्लेटहरु हटाएको हो ।
निर्वाचन आचार संहिता उल्लंघन गरि सार्वजनिक स्थलमा प्रयोग गरिएका चुनावी प्रचारका सामाग्रीहरु शुक्रबार देखि हटाउन थालिएको भन्दै पर्साका मुख्य निर्वाचन अधिकृत विनोद पोखरेलले दल र उम्मेदवारहरुले फेरि अटेर गरि त्यस्ता गतिविधी गरेको पाइए निर्वाचन ऐन अनुसार कारबाहीको दायरमा ल्याइने पनि बताए ।