विराटनगर,२३कात्तिक :मोरङको जहदामा एक जनाको हत्या भएको छ । जहदा गाउँपालिका–२ मोहनपुरका ४० वर्षीय बुधराम सोरेनको आइतबार दीपावलीकाे राति हत्या भएको हो ।
साेरेनकाे हत्या उनकी श्रीमती ३५ वर्षीया कमली बास्के र उनका भारतीय प्रेमी मिलेर गरेको प्रहरीको प्राम्भिक अनुसन्धानबाट खुलेको छ ।
सोरेनको रड प्रहार गरी हत्या गरेको आरोपमा प्रहरीले दुवै जनालाई पक्राउ गरेको छ।
आइतबार राति करिब ९ बजेतिर टाउकोमा फलामको रड प्रहार गरी उनको हत्या गरिएको मोरङका एसपी कवित कटवालले बताए ।
उनका अनुसार सोरेनकी ३५ वर्षीया श्रीमती कमली बास्के र भारतको बिहार राज्यअन्तर्गत कटिहारका २७ वर्षीय सुनील मिश्रले बुधराममाथि रड प्रहार गरेका थिए । गम्भीर घाइते सोरेनको घटनास्थलमै मृत्यु भएको जानकारी एसपी कटवालले दिए ।
उनका अनुसार कमली र भारतीय नागरिक सुनीलबीच प्रेम सम्बन्ध रहेको प्रारम्भिक अनुसन्धानबाट खुलेको छ ।
प्रेम सम्बन्धबारे बुधरामले थाहा पाएपछि दुवै मिलेर योजना बनाई उनको हत्या गरेको प्रहरीको प्रारम्भिक निष्कर्ष छ ।
विवाहेत्तर सम्बन्धकै कारण योजनाबद्ध रूपमा हत्या गरिएको प्रारम्भिक निष्कर्ष निकालेको प्रहरीले विभिन्न कोणबाट घटनाको अनुसन्धान गरिरहेको छ ।