वीरगन्ज,२३ साउनः वीरगन्ज्बाट प्रहरीले ठूलो परिमाणमा घरेलु मदिरा (लोकल रक्सी) सहित चार जनालाई पक्राउ गरेको छ । प्रहरीले लोकल रक्सी ओसार पसारम प्रयोग गरिएको एउटा हायस गाडीपनि नियन्त्रणमा लिएको छ ।
विशेष सूचनाको आधारमा जिल्ला प्रहरी कार्यालय पर्साबाट शनिबार खटिएको प्रहरी टोलीले वीरगन्ज–१५ प्रतिमा चोक स्थित सडकखण्डमा हेटौडाबाट वीरगन्जतर्फ आउँदै गरेको बा.प्र.०३–००१ ज १४०२ नम्बरको हायस गाडी रोकेर चेकजाँच गरेको थियो ।
त्यसक्रममा उक्त गाडीमा लुकाइ छिपाई राखेको प्लाष्टिकको बोराभित्र १०८ वटा पोकामा रहेको २ हजार २०० लिटर तयारी घरेलु मदिरा फेला परेकोले सवारी साधनसहित त्यसका चालकसहित चार जनालाई नियन्त्रणमा लिइएको प्रहरीले जनाएको छ ।
पक्राउ पर्नेहरुमा जिल्ला मकवानपुरको हेटौडा–१० का २९ वर्षीय मनोज कुमार थिङ,बाराको जीतपुरसिमरा–१ की ३५ वर्षीया कोपिला गुरुङ, ३६ वर्षीया रोनु तामाङ र ३३ वर्षीया माया पाख्रिन रहेका छन् ।
मदिरासहित गाडी र ती चारै जनालाई थप अनुसन्धान तथा कारबाहीको लागि आन्तरिक राजस्व कार्यालय वीरगन्जमा बुझाइएको पर्साका प्रहरी नायब उपरीक्षक चक्रबहादुर मल्लले जानकारी दिए ।
यस्तै शनिबार नै वीरगन्ज–१५ त्रिशुल चोक स्थित विभिन्न खाजा होटलमा लकुाएर राखिएको थप ७५ पोकामा रहेको १ हजार ३०० लिटर घरेलु मदिरा बरामद गरिएको प्रहरी नायब उपरीक्षक मल्लले जानकारी दिए ।