काठमाडौं,८असार:सन् १९३४ मा पहिलो पटक विश्वकप खेलेको इजिप्टले ९२ वर्षको लामो प्रतीक्षापछि जारी विश्वकप फुटबल प्रतियोगितामा आफ्नो पहिलो जित हात पारेको छ । साेमबार बिहान भएको खेलमा इजिप्टले न्युजिल्यान्डलाई ३-१ ले हराएको हाे।
यो जितसँगै इजिप्ट समूह ‘जी’ को शीर्ष स्थानमा पुगेको छ र नकआउट चरणमा पुग्ने बलियो सम्भावना पनिबनाएको छ।
इजिप्टका लेजेन्डरी खेलाडी मोहम्मद सलाहले खेलमा उत्कृष्ट प्रदर्शन गर्दै एक गोल गरे र अर्को गोलका लागि अवसर मिलाइदिए। त्यस्तै, मोस्टाफा जिकोले पनि एक गोल र एक ‘असिस्ट’ गर्दै टोलीको जितमा महत्वपूर्ण भूमिका निभाए।
खेलमा सुरुमा पछि परेको अवस्थालाई उल्टाउँदै इजिप्टले न्युजिल्याण्डलाई ३-१ ले पराजित गरेको हो। यो जितले इजिप्ट इतिहासमै पहिलो पटक समूह चरण पार गर्ने बाटोमा देखिएको छ।
खेलको १५औं मिनेटमा टिम पेनको कर्नरमा फिन सुरम्यानले हेडमार्फत गोल गर्दै न्युजिल्याण्डलाई सुरुवाती अग्रता दिलाएका थिए।
इजिप्टका प्रशिक्षक होसाम हसानले खेलको रणनीतिमा केही परिवर्तन गरेपछि टोलीले दोस्रो हाफको २४ मिनेटभित्र ३ गोल गर्न सफल भयो। खेलको ५८औं मिनेटमा मोहम्मद हानीको क्रसमा मोस्टाफा जिकोले हेडमार्फत गोल गर्दै खेल बराबरीमा ल्याए।
त्यसपछि सलाहले पेनाल्टी एरियामा जिकोसाग पास साटासाट गर्दै उत्कृष्ट गोल गरेर इजिप्टलाई अग्रता दिलाए। खेलको ८२औं मिनेटमा सलाहकै कर्नरमा मैदान छिरेका वैकल्पिक खेलाडी ट्रेजेगुएले हेडमार्फत गोल गर्दै इजिप्टको ३-१ को जित पक्का गरे।
आफ्नो चौथो विश्वकप सहभागितामा इजिप्टले पहिलो जित दर्ता गरेको हो। अब आगामी शनिबार हुने खेलमा इरानलाई हराएमा इजिप्ट समूह विजेता बन्नेछ। यता न्युजिल्याण्डले भने प्रतियोगितामा अघि बढ्न बेल्जियमविरुद्धको खेलमा जित निकाल्नै पर्ने दबाब छ।साभार:सेताेपाटी