वीरगन्ज,२०असाेज:अविरल वर्षाका कारण आएको बाढी र डुबानले क्षति पुर्याएको वीरगन्ज–ठोरी हुलाकी सडकखण्ड अन्तर्गत वीरगन्ज-२४ रामगढवा सडक खण्डको मर्मत कार्य वीरगन्ज महानगरपालिकाले गरेसँगै आवागमन सहज बनेको छ।
बाढी र डुबानका कारण सडक धस्सिनुका साथै खाल्डो परेर आवतजावतमा कठिनाई आएको थियो । महानगरले तत्काल माटो पुरेर ग्रेबल बिछ्याउने काम गरेसँगै अहिले स्थानीयवासी र सवारी साधनको आवातजावत सहज बनेको छ।महानगरका मेयर राजेशमान सिंह आँफैले विभिन्न वडामा पुगेर बाढी र डुबानको स्थलगत अवलोकन गर्नुका साथै उद्धार तथा राहत कार्यका लागि जनशक्ति परिचालन गर्न निर्देशन दिएका थिए।
मेयर सिंहले भने, “हामीले तत्काल जनजीवन सहज बनाउन प्राथमिकताका रूपमा सडक र आवागमन पुनःस्थापनामा ध्यान केन्द्रित गरेका छौं। प्रभावित वडाहरूमा स्थायी समाधानका लागि दीर्घकालीन योजना तय गरेर काम गरिरहेका छौं ।”
बाढी र डुबानका कारण रामगढवा मात्र नभई महानगरका अन्य वडाहरूमा पनि सडक, नाला, पुलपुलैया र सार्वजनिक संरचनाहरूमा क्षति पुगेको छ। ती क्षेत्रमा समेत महानगरले चरणबद्ध रूपमा मर्मत तथा पुनर्निर्माण कार्य तीव्र गतिमा अगाडि बढाएको छ।