वीरगन्ज,२७असारःवीरगन्ज महानगरपालिका वडा नम्बर १० मा पानीको संकट चुलिएपछि वडाध्यक्ष सुशील साह कानुले घर घरमा पुगेर डीप बोरिङको पाइपलाइनबाट विद्युतीय मोटर जोडेकाहरुको पाइप काट्न सुरु गरेका छन् ।
वडाध्यक्ष कानुले शुक्रबारदेखि आँफै घरघरमा पुगेर बोरिङबाट पानी आपुर्ति भइरहेको पाइपलाइनको पाइपमा मोटर जोडिएको पाइप काटेर ती घरको बाहिरपट्टी एउटा मात्र धारा राख्न थालेका हुन् । शुक्रबार वडा नम्बर १० मा पर्ने बजरंग टोल र ग्यालेक्सी स्कुल रहेको टोदमा पुगेर वडाध्यक्षले मोटर जोडिएका ४७ वटा घरको पाइप काटेर ती घरका अगाडि एउटा मात्रै धारा राखेका छन् ।
शुक्रबारदेखि सुरु गरिएको मोटरको पाइप काट्ने काम अब वडा नम्बर १० का हरेक टोलमा पुगेर गरिने वडाध्यक्ष कानुले बताए ।
वडाध्यक्ष कानुका अनुसार, वडा नम्बर १० मा मात्रै विभिन्न टोलमा गरी २७ वटा डीप बोरिङ गाडिएको छ । तीबाट वडा नम्बर १० का करिब १८ सय घरधुरीममा पानीको आपूर्ति भइरहेको वडाध्यक्ष कानुले बताए ।
डीप बोरिङको पाइपलाइनबाट सिधै मोटर जोडेर छतमा रहेको ट्यांकी, शौचालय र भान्छामा पाइप लगेर पानी भर्ने गरिएका कारण अन्य धाराहरुमा पानी नआउने , आएपनि कम आउने गर्दा पानीको समस्या झन् बढेको वडाध्यक्ष कानुले बताए । उनले भने,‘ मोटर जोडेर एउटै घरमा चार पाच वटा टुटी लगाइएको पनि भेटिएको छ ।’
त्यसैका कारण शुक्रबारदेखि आँफु स्वंय टोल टोलमा पुगेर डीप बोरिङको पाइपलाइनमा सिधै जोडिएको मोटरको पाइप काट्न थालेको उनले बताए । सिधै मोटर नजोड्ने हो भने अहिलेददेखिएको पानीको संकट धेरै हदसम्म समाधान हुने उनले बताए ।
विपदका बेला केहि मानिसले आफ्नोमात्रै सुख सुविधा खोजेको तर त्यसले अन्न्य मानिसलाई थप मर्का परिरहेको भन्दै वडाध्यक्ष कानुले भने,‘अहिले पानीको संकट बढेको छ । यो विपदमा सुविधा खोज्ने होइन , संकट टार्ने काम गर्नुपर्छ । ’
साथै अब शनिबारदेखि अनुगमनका क्रममा सिधै मोटर जोडिएको पाइएको भेटिएमा उक्त मोटर जफत गर्नुका साथै सम्बन्धित घरधनीलाई ५ हजार रुपैयाँ जरीवाना गरिने जानकारीपनि वडाध्यक्ष कानुले बताए ।