काठमाडौं,१४जेठ:नेपाली कांग्रेसका पूर्वसांसद मोहम्मद अफताब आलम कारागारबाट छुटेका छन् ।
उच्च अदालत जनकपुरकाे अस्थायी इजलास वीरगन्जले आलमलाई बुधबार सफाइ दिएको र अदालतबाट सफाइको पत्र प्राप्त भएसँगै बुङबेलुकी उनलाई काठमाडौंकाे नख्खु कारागारबाट रिहा गरिएको हो ।
आलमलाई राैतहट जिल्ला अदालतले दोषी ठहर गर्दै जन्मकैदको फैसला गरेको थियो । जिल्ला अदालतको उक्त फैसला उल्ट्याउँदै उच्च अदालत जनकपुरकाे अस्थायी इजलास वीरगन्जले बुधबार आलमलाई सफाइ दिएको थियाे ।
पहिलाे संविधान सभाको निर्वाचनको अघिल्लो राति २७ चैत २०६४ मा रौतहटको राजपुरस्थित इँटा भट्टामा पोलेर व्यक्ति हत्या गरेको आरोपमा उनी दोषी ठहर भएका थिए ।
घटनाको १२ वर्षपछि रौतहट प्रहरीले आलमलाई १९ असोज २०७६ मा पक्राउ गरेको थियो ।
आलमका काका शेख इन्द्रिसको घरमा बम बनाउने क्रममा त्रिलोकप्रताप सिंह र ओशी अख्तरसहित घाइतेहरूलाई जिउँदै इँटाभट्टामा जलाएर हत्या गरेको आरोप आलममाथि थियो ।