वीरगन्ज,२९ भदौं : तेरापंथ युवक परिषदले पर्सा र बारामा एकैसाथ सञ्चालन गरिरहेको बृहत रक्तदान शिविरमा ६ सय ५० पिन्ट(पोका) रगत संकलन भएको छ । भदौं २५ देखि सुरु रक्तदान शिविरमा शनिबारसम्म ६ सय ५० जनाले रगत दान गरेका हुन् ।
शनिबार वीरगन्जमा आयोजित रक्तदान शिविरमा २ सय ११ जनाले रगतदान गरेका छन् ।वीरगन्ज–१० आदर्शनगरस्थित जैन भवनमा शनिबार वीरगन्ज महानगरपालिकाका मेयर राजेशमान सिंहको प्रमुख आतिथ्यतामा भएको रक्तदान शिविरमा महिला र पुरुष गरी २ सय ११ जनाले रगत दान गरेको तेरापंथ युवक परिषदका अध्यक्ष लोकेश जैनले जानकारी दिए ।
यसअघि शुक्रबार वीरगन्जको ड्राइपोर्टमा आयोजित रक्तदान शिविरमा ३५ जनाले , बिहिबार बाराको सिमरास्थित किरण आँखा अस्पतालमा २५ जनाले र नन्दन घ्यू उद्योगमा १ सय ११ जनाले ,बुधबार सिमराको हुलास स्टिल उद्योगमा १ सय ३० जनाले र वीरगन्जको बेलवास्थित हिप्पो स्टिल उद्योगमा ३१ जनाले रक्तदान गरेको अध्यक्ष जैनले जानकारी दिए । शिविरको पहिलो दिन मंगलबार एमबी दुगड ग्रुपमा आयोजित शिविरमा भने १ सय ७ जनाले रक्तदान गरेका थिए ।
आइतबार बाराको नितनपुरस्थित त्रिवेणी ग्रुपमा रक्तदान शिविर आयोजना गरिने जानकारी अध्यक्ष जैनले दिए ।पर्सा र बाराका विभिन्न औद्योगिक प्रतिष्ठान र अस्पतालमा असोज ४ गतेसम्म रक्तदान शिविर आयोजना गरिने उनले बताए । भदौं २५ देखि सुरु भएर असोज ४ गते सकिने बृहत रक्तदान शिविरमा कूल १ हजार ५ सय पिन्ट रगत संकलन गर्ने लक्ष्य रहेको उनले सुनाए । संकलित रगत वीरगन्जस्थित नेपाल रेडक्रस सोसाइटी पर्साको रक्त सञ्चार केन्द्रमा जम्मा गरिने जैनले बताए ।परिषदले यसअअघि २०७९ सालमा पनि वीरगन्जमा आयोजना गरेको एकदिने रक्तदान कार्यक्रममा ४ सय २३ युनिट रगत संकलन भएको थियो ।