क्रान्ति शाह
वीरगन्ज , २० असोज : बाराको अमलेखगन्जमा बिहबिार भएको बस दुर्घटनामा मृत्यु हुनेको संख्या १४ पुगेको छ । प्रहरीका अनुसार घटनास्थलमा १० जनाको र हेटौडाका अस्पतालमा उपचारका क्रममा ४ जनाको मृत्यु भएको हो ।
जिल्ला प्रहरी कार्यालय मकवानपुरका प्रहरी निरिक्षक बलराम श्रेष्ठका अनुसार , घटनास्थलमा १० जनाको , हेटौंडा अस्पतालमा २ जनाको तथा चुरेहिल अस्पताल र मकवानपुर सहकारी अस्पतालमा १–१ जनाको मृत्यु भएको हो ।प्रहरीका अनुसार, मृत्यु हुनेमा ८ पुरुष र ६ महिला छन् । तर उनीहरुको सनाखत हुन भने बाँकी छ ।
नारायणगढबाट वीरगन्ज आउदै गरेको बा प्र.०६–००१ ख–०११० नम्बरको बस बिहीबार बिहान साढे १० बजेतिर तीन नम्बर पुल नजिकैको मोडमा सडकबाट खोलामा खसेको थियो ।
दुर्घटनामा २५ जना भन्दा बढि घाइते भएकोमा ती मध्ये १५ जनाको अवस्था गम्भिर रहेको छ । घाइतेहरुको हेटौडाका विभिन्न अस्पताल र सिमराको अल्पाइन अस्पतालमा उपचार भइरहेको छ ।
बस , तीन नम्बर पुल नजिकैको मोडमा नमोडिकन सडकबाट करिब १५ मिटर तल खोलामा खसेको बाराका प्रहरी उपरिक्षक होविन्द्र बोगटीले बताए ।