वीरगन्ज,५बैशाखः पर्साको पटेर्वा सुगौली गाँउपालिका वडा नम्बर ३ सोनवर्षामा नवनिर्मित स्वास्थ्य चौकीको भवनको शुक्रबार समुद्घाटन गरिएको छ ।जिल्ला समन्वय समिति पर्साका प्रमुख अजय सर्राफले उक्त भवनको समुद्घाटन गरेका हुन् । त्यसअवसरमा गाँउपालिका अध्यक्ष दिनेश चौधरी,उपाध्यक्ष ममता महत्तो र प्रमुख प्रशासकीय अधिकृत प्राण मेहतकोपनि उपस्थिती थियो ।
८० लाख रुपैयाँको लागतमा सुविधासम्पन्न दुई तल्ले स्वास्थ्य चौकीको भवन निर्माण गरिएको गाँउपालिका उपाध्यक्ष महत्तोले जानकारी दिइन् । जसमा जिल्ला समन्वय समितिको ६० प्रतिशत र पटेर्वा सुगौली गाँउपालिकाको ४० प्रतिशत लगानी रहेको उनले बताइन् ।
नवनिर्मित स्वास्थ्य चौकी भवनमा कूल ६ वटा कोठाहरु रहेको छ । ओपिडी र लेबर रुमसहित शौचालयपनि रहेको उनले बताइन् ।
मुलुक संघीय संरचनापछि गएपछि वडा नम्बर ३ मा स्वास्थ्य चौकी नै सञ्चालनमा नरहेको अवस्थामा त्यस वडाका नागरिकको समस्यालाई ध्यानमा राखेर नयाँ भवन निर्माण गरेर स्वास्थ्य चौकी सञ्चालनमा ल्याइएको गाँउपालिका अध्यक्ष चौधरीले बताए । अब त्यस वडाका नागरिकलाई स्वास्थ्य सेवा लिन अन्यत्र धाउनुपर्ने बाध्यता हटेकोपनि उनले बताए । उनले उक्त स्वास्थ्य चौकीबाट छिट्टै प्रसूती सेवापनि सञ्चालन गर्ने तयारी भइरहेको जानकारीपनि गराए ।
वडाध्यक्ष माधवप्रसाद राय थारुको अध्यक्षता तथा गाँउपालिकाका अध्यक्ष चौधरी र उपाध्यक्ष महत्तोको विशिष्ठ आतिथ्यतामा भएको उद्घाटन कार्यक्रममा ,वडा नम्बर २ का वडाध्यक्ष विजय गैरे ,गाँउपालिकाको स्वास्थ्य शाखाका प्रमुख भोजेन्द्र यादव , स्वास्थ्य चौकीका इन्चार्ज दिपनारायण चौधरी,स्थानीय अगुवा, महिला स्वास्थ्य स्वंयसेविका लगायतकाकोपनि सहहभागीता थियो ।